काठमाडौं । उद्योग वाणिज्य महासंघको आगामी निर्वाचनको लागि आज किशोर प्रधानको नेतृत्वमा रहेको टिमले दिउँसो २ बजे मनोनयन दर्ता गर्ने भएको छ ।
वरिष्ठ उपाध्यक्ष पदमा किशोर प्रधान, वस्तुगत उपाध्यक्षमा अन्जन श्रेष्ठ, जिल्ला नगर उपाध्यक्षमा दिनेश श्रेष्ठ र एशोसियट उपाध्यक्षमा शौरभ ज्योती मनोनयन दर्ता गर्न लागेका हुन् ।
शौरभ ज्योती भने अझै कोरोना पोजेटिभ नै रहेका कारण आजको मनोनयन कार्यक्रममा उपस्थित नहुने जनाइएको छ । तर, अन्य धेरै सदस्यहरु भने मनोनयन दर्ता कार्यक्रममा उपस्थित हुने बताइएको छ ।
उम्मेदवारी घोषणा सभामा वर्तमान वरिष्ठ उपाध्यक्ष शेखर गोल्छाको पनि उपस्थिती रहेको छ ।
निर्वाचनको लागि अर्को प्यानलले भने यस अघि नै मनोनयन दर्ता गराइसकेको छ । वर्तमान एशोसियट उपाध्यक्ष चन्द्र ढकालले वरिष्ठ उपाध्यक्षमा आफ्नो मनोनयत दर्ता गराएका हुन् ।
उनको प्यानलबाट वरिष्ठ उपाध्यक्षमा चन्द्र ढकाल, एशोसियट उपाध्यक्षमा रामचन्द्र सांघाइ, वस्तुगत उपाध्यक्षमा उमेशलाल श्रेष्ठ र जिल्ला नगर उपाध्यक्षमा गुणनिधी तिवारीले मनोनयन दर्ता गराएका हुन् ।
उद्योग वाणिज्य महासंघको निवार्चन आगामी मंसिर ११ देखि १३ गतेसम्म काठमाडौंमा हुँदैछ ।
