काठमाडौं । कोरियाली प्रविधि कम्पनी सामसङ विश्वकै उत्कृष्ट स्मार्टफोन ब्रान्ड बन्न सफल भएको छ ।
इन्टरनेशनल डाटा कर्पोरेशन (आइडीसी) ले सार्वजनिक गरेको सन् २०२० को तेस्रो त्रैमासको तथ्यांक अनुसार स्मार्टफोनको विश्व बजारको कुल हिस्सामध्ये २२.७० प्रतिशत हिस्सा ओगट्दै उत्कृष्ट ब्रान्ड बन्न सफल भएको हो ।
आइडीसीले सम्बन्धित कम्पनी वा ब्रान्डले सिपमेन्ट गरेको फोनको संख्या र बजार हिस्सालाई आधार मान्नेर सूची सार्वजनिक गरेको हो ।
आइडीसीको तथ्यांक अनुसार कोरियाली चिनियाँ कम्पनी हुवावे दोस्रोमा रहेको छ । यस्तै, अमेरिकी कम्पनी एप्पललाई उछिन्दै चिनियाँ कम्पनी साओमी तेस्रो स्थानमा उक्लिएको छ । साओमीले चिनियाँ कम्पनी ओप्पोलाई समेत पछि पारेको छ ।
यस्तै, बजार हिस्सा घट्दै गएको एप्पल चौथो र चिनियाँ कम्पनी भिभो ब्रान्डका आधारमा विश्वको उत्कृट पाँच कम्पनी बनेका छन् । २०२० को तेस्रो त्रैमाससम्ममा विश्व बजारमा कुल ३५ करोड ३६ लाख थान स्मार्टफोन आपूर्ति भएका छन् । यो अघिल्लो वर्षको सोही अवधिको तुलनामा ४९ लाख थानले बढी थियो ।
सामसङले चालू वर्षको तेस्रो त्रैमाससम्ममा ८ करोड ४ लाख थान सिपमेन्ट गरेको आइडीसीको तथ्यांकले देखाएको छ । यस्तै, हुवावेको ५ करोड १९ लाख, साओमीको ४ करोड ६५ लाख र एप्पलको ४ करोड १६ लाख थान रहेको छ । सामसङको बजार हिस्सा गत वर्षको तुलनामा करीब १ प्रतिशतले बढेर २२.७ प्रतिशत पुगेको छ ।
यस्तै, समीक्षा अवधिमा हुवावेको बजार हिस्सा झन्डै ४ प्रतिशत र सिपमेन्टमा २२ प्रतिशतले गिरावट देखिएको छ । साओमीले भने विश्व बजारमा गत वर्षको भन्दा ४२ प्रतिशतले बजार हिस्सा बढाएको छ । समीक्षा अवधिमा साओमीले गत वर्षको भन्दा १ करोड ३८ लाख थान बढी स्मार्टफोन सेट विश्व बजारमा पुर्याएको छ । साओमीको बजार हिस्सा अघिल्लो वर्षको ९.१ प्रतिशतबाट अहिले १३.१ प्रतिशत पुगेको छ ।
बजार गुमाउँदै गएको एप्पलको भने बजार हिस्सा समीक्षा अवधिमा १३ प्रतिशतबाट ११.८ प्रतिशतमा झरेको देखिन्छ । यस अवधिमा यसको सिपमेन्ट पनि १०.६ प्रतिशतले कम भएको छ ।
पाँचौं स्थानमा रहेको भिभोले गत वर्षको तेस्रो त्रैमासको तुलनामा यस वर्षको सोही अवधिमा ४.२ प्रतिशतले स्मार्टफोन सिपमेन्ट वृद्धि गर्दै ३ करोड १५ लाख थान पुर्याएको छ । बजार हिस्सा पनि ०.५ प्रतिशतले बढाएर ८.९ प्रतिशत हासिल गरेको छ ।
