काठमाडौं । सेयर बजारमा करेक्शन आएको छ । बुधबार ४१ अंकले बढेको बजारमा आज झिनो करेक्शन आएको हो ।
सूचकमा न्यून गिरावट आए पनि कारोबार रकममा भने बढोत्तरी आएको छ । अघिल्लो दिनको तुलनामा आज कारोबार रकम करिब ३० करोडले बढेको छ ।
सेयर बजार मापक सूचक नेप्से १.७८ अंकले घटेर १६४५.६८ विन्दुमा आइपुगेको छ । यसदिन १९२ कम्पनीको ३ अर्ब ३ करोड ७६ लाख ९४ हजार ८४५ रुपैयाँ बराबरको कारोबार भएको छ । १ करोड ३ लाख ६५ हजार ६०७ कित्ता सेयर किनबेच भएका छन् ।
कारोबारमा आएका १२ वटा समूहमध्ये ६ समूहको परिसूचक हरियो भएका छन् भने ६ वटै समूहको परिसूचक राताम्मे भएका छन् । आज सबैभन्दा धेरै निर्जीवन बीमा समूहको परिसूचक ३९.८९ अंकले बढेको छ भने उत्पादनमूलक समूहको ३४.८५ अंकले घटेको छ ।
आज पनि लगानीकर्ता वाणिज्य बैंकहरुको सेयरमा झुम्मिएका छन् । धेरै कारोबार भएका १० कम्पनीमध्ये ९ वटा वाणिज्य बैंक रहेका छन् ।
आज लगानीकर्ताको रोजाइमा प्राइम कमर्शियल बैंक परेको छ । यसको सबैभन्दा धेरै १३ करोड ७८ लाख रुपैयाँभन्दा बढीको सेयर किनबेच भएको छ । कारोबारकै आधरमा प्रभु र एनएमबी बैंकको सेयर क्रमशः दोस्रो र तेस्रो स्थानमा रहे ।
आज दुई कम्पनीको सेयर मूल्यमा पोजेटिभ सर्किट लागेको छ । शिवश्री हाइड्रोपावर र नेपाल फाइनान्सका सेयरधनीले १० प्रतिशत कमाएका छन् । आज सिन्धु विकास बैंकका सेयरधनीले सबैभन्दा धेरै ३.६१ प्रतिशतले गुमाएका छन् ।
