काठमाडौं । कोरोना महामारीका बीच चीनको अर्थतन्त्रमा निरन्तर वृद्धि देखिएको छ । चालू आवको पहिलो त्रैमासमा ६.८ प्रतिशतले ऋणात्मक भएको चीनको अर्थतन्त्र त्यसयता भने निरन्तर उकालो लागेको हो ।
सोमबार चीनको नेशनल ब्युरो अफ स्ट्याटिस्टिक्स (एनओएस)ले सार्वजनिक गरेको तथ्यांक अनुसार सन् २०२० को तेस्रो त्रैमासमा चीनको कुल गार्हस्थ्य उत्पादन (जीडीपी) अघिल्लो वर्षको सोही अवधिको तुलनामा ४.९ प्रतिशतले बढेको छ ।यसअघि दोस्रो त्रैमासमा चीनको जीडीपी ३.२ प्रतिशतले बढेको थियो ।
कोरोनाको महामारीको कारण पहिलो त्रैमासमा आर्थिक गिरावटको सामना गरे पनि त्यसयता भने चीनको अर्थतन्त्रमा निरन्तरको सुधार देखिएको हो ।सन् २०२० को सुरुआती ९ महिनामा चीनको अर्थतन्त्र अघिल्लो वर्षको तुलनामा ०.७ प्रतिशतले बढेको छ ।
पछिल्लो समय चीनको विभिन्न आर्थिक सूचकहरुमा पनि निरन्तर सुधार आइरहेको देखिएको छ । गत सेप्टेम्बर महिनाको तथ्यांकअनुसार चीनको निर्यात ९.९ प्रतिशत बढेको थियो भने आयातमा पनि १३.२ प्रतिशतको वृद्धिदर हासिल भएको थियो । यसले पनि व्यापारको हिसाबमा चीन लयमा फर्किन थालेको देखाएको छ ।
विश्लेषकहरुका अनुसार पछिल्लो समय चीनको आन्तरिक खपतमा वृद्धि, निर्यातमा देखिएको उल्लेख्य सुधार लगायत कारण अर्थतन्त्र निरन्तर उकालो लागेको हो ।
यद्यपि कोरोनाको महामारीको कारण कमजोर बनेको चीनको अर्थतन्त्र पूर्णरुपमा समस्याबट बाहिर आयो भन्न सक्ने अवस्था भने नरहेको उनको भनाइ छ ।एजेन्सी