काठमाडौं । जनरल इन्स्योरेन्सको प्राथमिक साधरण सेयर (आइपीओ) बाँडफाँट भएको छ।
विक्री प्रबन्धक एनआइबीएल क्यापिटलमा गरिएको बाँडफाँट अनुसार २ लाख ७३ हजार जनाले १० कित्ताका दरले सेयर पाएका छन् भने ५ लाख २१ हजार ५४६ जनाको हात खालि भएको छ ।
कम्पनीको आइपीओमा कुल ७ लाख ९४ हजार ५४६ जनाले आवेदन दिएका थिए । त्यसमध्ये २ हजार १८८ आवेदन रद्द भएको छ ।
कम्पनीले असोज ११ गतेदेखि १०० रुपैयाँ अंकित दरमा ३० करोड रुपैयाँ बराबरको ३० लाख कित्ता आइपीओ निष्काशन गरेको थियो ।
जसमा १ लाख २० हजार कित्ता (४ प्रतिशत) संस्थाका कर्मचारी र १ लाख ५० हजार कित्ता (५ प्रतिशत) सामूहिक लगानी कोषका लागि छुटयाइएको थियो । बाँकी २७ लाख ३० हजार कित्ताका लागि सर्वसाधारणले आवेदन दिएका थिए ।
हाल ७० करोड कम्पनीको चुक्ता पूँजी रहेको कम्पनीको आइपीओपछि चुक्ता पूँजी १ अर्ब रुपैयाँ पुग्नेछ ।
इन्स्योरेन्सले गत आर्थिक वर्षमा २० करोड ९६ लाख रुपैयाँ खुद बीमाशुल्क आर्जन गरी ५ करोड ६ लाख नाफा कमाएको थियो । कम्पनीको प्रतिसेयर आम्दानी ७.२३ रुपैयाँ छ भने प्रतिसेयर नेटवर्थ १०४.०२ रुपैयाँ रहेको छ ।
