काठमाडौं । सेयर बजारमा पहिरो गएको छ । बजार खुलेदेखि नै निरन्तर ओरालो लागेको बजार दोहोरो अंकले घटेर बन्द भएको हो ।
यो साता आइतबार सामान्य सुधार देखिएको बजारमा पछिल्ला दुई दिन लगातार गिरावट आएको हो । प्रफिट बुक गर्ने हाबी हुँदा बजार घटेको अनुमान गरिएको छ । सूचकमा गिरावट आए पनि कारोबार रकम भने उत्साहजनक नै रहेको छ ।
सेयर बजार मापक सूचक नेप्से २२.९१ अंकले घटेर १५४६.१६ बिन्दुमा आइपुगेको छ । यसदिन १९९ कम्पनीको २ अर्ब ८१ करोड ४ लाख २५ हजार २६७ रुपैयाँ बराबरको कारोबार भएको छ । ७८ लाख ५० हजार ६५ कित्ता सेयर किनबेच भएका छन् ।
कारोबारमा आएका १२ वटा समूहमध्ये व्यापार समूह बाहेक अन्यसबै समूहको परिसूचक ओरालो लागेका छन् । आज व्यापार समूहको परिसूचक ७.११ अंकले बढेको छ भने निर्जीवन बीमा समूहको परिसूचक ११२.६६अंकले घटेको छ ।
आज कारोबारमा आएका १९९ कम्पनीमध्ये जम्मा १२ कम्पनीको सेयर मूल्य बढेको छ भने १५५ कम्पनीको मूल्यमा गिरावट आएको छ । अन्य कम्पनीको मूल्य स्थिर रहेको छ ।
आज लगानीकर्ताको रोजाइमा शिखर इन्स्योरेन्सपरेको छ । यसको सबैभन्दा धेरै ३१करोड ९४ लाख रुपैयाँभन्दा बढीको सेयर किनबेच भएको छ । कारोबारकै आधरमा नेपाल बैंक र पुनर्बीमा कम्पनीको सेयर क्रमशः दोस्रो र तेस्रो स्थानमा रहे ।
आज सबैभन्दा धेरै युनाइटेड फाइनान्सका लगानीकर्ताले कमाएका छन् । यसको सेयर मूल्य ६.८२ प्रतिशतले बढेको छ ।
घट्दो बजारमा ३ कम्पनीको सेयर मूल्यमा नेगेटिभ सर्किट लागेको छ । आज लिवर्टी इनर्जी, घलेम्दी र युनाइटेड मोदी हाइड्रोपावरका लगानीकर्ताले करिब १० प्रतिशत गुमाएका छन् ।
