काठमाडौं । सेयर बजारमा सामान्य गिरावट आएको छ । साताका दुई दिनमा करिब २० अंकले बढेको बजार आज करिब साढे ४ अंकले घटेको छ ।
सूचकमा सामान्य गिरावट आएपनि कारोबार रकम भने ह्वात्तै घटेको छ । अघिल्लो दिनको तुलनामा आज कारोबार रकम १ अर्ब ३३ करोड रुपैयाँभन्दा बढीले घटेको छ ।
सेयर बजार मापक सूचक नेप्से ४.४७ अंकले घटेर १५३६.०३ बिन्दुमा आइपुगेको छ । यसदिन १९१ कम्पनीको १ अर्ब ८० करोड १ लाख ९७ हजार ९०२ रुपैयाँ बराबरको कारोबार भएको छ । ५७ लाख २३ हजार ५६३ कित्ता सेयर किनबेच भएका छन् ।
कारोबारमा आएका १२ वटा समूहमध्ये ९ समूहको परिसूचक ओरालो लागेका छन् भने ३ समूहको परिसूचक उकालो लागेका छन् । आज जीवन बीमा समूहको परिसूचक सबैभन्दा धेरै १७.३३ अंकले बढेको छ भने विकास बैंक समूहको परिसूचक १४.५५अंकले घटेको छ ।
आज पनि लगानीकर्ताको रोजाइमा नेपाल पुनर्बीमा कम्पनीको सेयर परेको छ । यसको सबैभन्दा धेरै १० करोड ७० लाख रुपैयाँभन्दा बढीको सेयर किनबेच भएको छ ।
पछिल्लो डेढ डेढ महिनादेखि पुनर्बीमा कम्पनी लगातार सबैभन्दा धेरै कारोबार हुने कम्पनीको शीर्ष स्थानमा रहँदै आएको छ । कारोबारकै आधरमा कुमारी बैंक र नेपाल लाइफ इन्स्योरेन्सको सेयर क्रमशः दोस्रो र तेस्रो स्थानमा रहे ।
घट्दो बजारमा पनि आज ५ कम्पनीको कम्पनीको सेयर मूल्यमा पोजेटिभ सर्किट लागेको छ । रिलायन्स लाइफ इन्स्योरेन्स, एनआरएन लघुवित्त, दिव्यश्वरी, घलेम्दी र खानीखोला हाइड्रोपावरका सेयरधनीले १० प्रतिशत कमाएका छन् ।
आज माउन्टेन हाइड्रोका सेयरधनीले सबैभन्दा धेरै करिब ४.८३ प्रतिशत गुमाएका छन् ।
