काठमाडौं । सेयर बजारले लय समात्दै गएको छ । यो साताको शुरुका दुई दिनमै करिब २३ अंकले घटेको बजार पछिल्लो ३ दिनमा करिब ३३ अंकले बढेको छ । साताभरीमा सूचक समग्रमा १० अंकले बढेको छ ।
आज सूचक बढे पनि कारोबार रकममा भने गिरावट आएको छ । हिजोको तुलनामा आज कारोबार रकम करिब ३९ करोड रुपैयाँले घटेको छ ।
सेयर बजार मापक सूचक नेप्से १२.४९ अंकले बढेर १५२०.६९ बिन्दुमा पुगेको छ । यसदिन १८९ कम्पनीको २ अर्ब १७ करोड ६८ हजार २८३ रुपैयाँ बराबरको कारोबार भएको छ । ४२ लाख ६२ हजार ६९८ कित्ता सेयर किनबेच भएका छन् ।
कारोबारमा आएका १२ वटा समूहमध्ये ९ समूहको परिसूचक उकालो लागेका छन् भने ३ समूहको परिसूचक ओरालो लागेका छन् । आज निर्जीवन बीमा समूहको परिसूचक सबैभन्दा धेरै ३०२.०२ अंकले बढेको छ भने व्यापार समूहको परिसूचक ३०.२१ अंकले घटेको छ ।
आज पनि लगानीकर्ताको रोजाइमा नेपाल पुनर्बीमा कम्पनीको सेयर परेको छ । यसको सबैभन्दा धेरै १७ करोड २१ लाख रुपैयाँभन्दा बढीको सेयर किनबेच भएको छ ।
पछिल्लो ४ हप्तादेखि पुनर्बीमा कम्पनी लगातार सबैभन्दा धेरै कारोबार हुने कम्पनीको शीर्ष स्थानमा रहँदै आएको छ । कारोबारकै आधरमा नागरिक लगानी कोष र नेपाल लाइफ इन्स्योरेन्सको सेयर क्रमशः दोस्रो र तेस्रो स्थानमा रहे ।
आज ३ कम्पनीको सेयर मूल्यमा सर्किट लागेको छ । बढ्दो बजारमा राष्ट्रिय बीमा कम्पनीको साधरण र प्रमोटर सेयर, एनआरएन इन्फ्राइस्ट्रक्चर र रिलायन्स लाइफ इन्स्योरेन्सको सेयर मूल्यमा पोजेटिभ सर्किट लागेको छ । यी कम्पनीका सेयरधनीले १० प्रतिशत कमाएका छन् ।
आज नबिल इक्वीटी फण्डका लगानीकर्ताले सबैभन्दा धेरै गुमाएका छन् । यसको सेयर मूल्य ५.७५ प्रतिशतले घटेको छ ।
