काठमाडौं । रिलायन्स लाइफ इन्स्योरेन्सको प्राथमिक साधरण सेयर (आइपीओ) बाँडफाँट भएको छ ।
कम्पनीले भदौ ४ गतेदेखि निष्काशन गरेको आइपीओ बिक्री प्रबन्धक सानिमा क्यापिटलले शुक्रबार (आज) बाँडफाँट गरेको हो ।
कम्पनीको आइपीओमा आवेदन दिएकामध्ये २० हजार ५०९ आवेदकको हात खाली भएको छ ।
सानिमा क्यापिटलका अनुसार रिलायन्सको आइपीओमा हालसम्मकै धेरै ५ लाख ८९ हजार ४६४ जनाले आवेदन दिएका थिए । त्यसमध्ये ५ लाख ६७ हजार आवेदकले १० कित्ताका दरले सेयर पाएका छन् । १ हजार ९५५ वटा आवेदन भने रद्द भएको क्यापिटलले जनाएको छ ।
रिलायन्स लाइफले १०० रुपैयाँ अंकित दरमा ६३ करोड रुपैयाँ बराबरको ६३ लाख कित्ता आइपीओ निष्काशन गरेको थियो । जसमा ५ प्रतिशत (३ लाख १५ हजार) कित्ता सामूहिक लगानी कोषका लागि र अर्को ५ प्रतिशत (३ लाख १५ हजार) कित्ता कर्मचारीहरुका लागि छुट्याएको थियो । बाँकी ५६ लाख ७० हजार कित्ताका लागि सर्वसाधरणले आवेदन गरेका थिए ।
इन्स्योरेन्सको अधिकृत पूँजी ३ अर्ब र जारी पूँजी २ अर्ब १० करोड रूपैयाँ छ। १ अर्ब ४७ करोड रूपैयाँ संस्थापक सेयरधनीबाट चुक्ता पूँजी कायम गरिसकेको इन्स्योरेन्सको आइपीओ निष्काशन पछि चुक्ता पूँजी २ अर्ब १० करोड पुग्नेछ।
