काठमाडौं । सेयर बजारमा अनलाइन कारोबार गर्नका लागि लगानीकर्ताले अब घरबाटै आफ्ना विवरणहरु भरेर पठाउन सक्ने भएका छन् ।
कोरोनाको कारण ब्रोकर कार्यालयसम्म पुग्न असहज बनेपछि नेपाल स्टक एक्सचेञ्ज (नेप्से) ले ग्राहक पहिचान खाता (केवाईसी) र अनलाइन युजर खाताको फारम घरैमा बसेर भर्न सकिने सुविधा ल्याएको हो । साथै, अनलाइनमार्फत नै केवाइसी पनि अद्यावधिक गर्न सकिनेछ ।
यसका लागि नेप्सेले सबै ब्रोकर कम्पनीहरुको टीएमएस लिंकमा अनलाइन रजिष्ट्रेसन गर्न सक्ने सुविधा उपलब्ध गराएको छ । यो सुविधा कार्यान्वयनमा आएसँगै आवश्यक युजरनेम र पासवर्ड लिन अब लगानीकर्ताहरु ब्रोकर कार्यालयसम्म धाउनु पर्ने बाध्यताको अन्त्य भएको छ ।
नयाँ व्यवस्थाबाट अनलाइन प्रयोगकर्ता बढाउन सहयोग पुग्ने नेप्सेको भनाइ छ । कोरोना संक्रमण बढेका बेला भौतिक दूरी कायम गर्न समेत सहयोग पुग्नेछ ।
कसरी भर्ने अनलाइन फारम
ब्रोकरको टीएमएसको लिंकमा गएपछि ब्रोकर कम्पनीहरुको लिस्ट दिइएको छ । त्यसमध्ये एउटा ब्रोकर छानी त्यसमा क्लिक गरेपछि नयाँ पेज खुल्छ । त्यो पेजमा देखिएको रजिस्टर अप्सनमा क्लिक गरेपछि नयाँ फारम खुल्छ । मागे बमोजिम विवरण भरी सबमिट गर्नु पर्दछ ।
लगानीकर्ताले त्यो फारम भरेर सबमिट गरेपछि ब्रोकरले त्यसलाई हेरेर भेरिफाइ गर्नेछ । यसमा अनलाइनबाटै लगानीकर्ताले आफ्ना मागेका व्यक्तिगत विवरणका साथै, बैंक विवरण, प्रडक्ट विवरण, डीपी विवरण र डकुमेन्ट अप्सनहरुले मागेका काजगातहरु अपलोड गरेर फारम भरेपछि सबमिट गर्नुपर्छ ।
संसारको कुनै पनि स्थानमा बसेर अनलाइनमार्फत यो भर्न सकिने नेप्सेले बताएको छ ।यसबाट बढीभन्दा बढी प्रयोगकर्ताहरु अनलाइन कारोबारमा सहभागी हुन सक्ने विश्वास नेप्सेले लिएको छ ।
