काठमाडौं । सरकारले अहिलेसम्म कोरोना भारइसको पीसीआर विधिबाट परीक्षणका लागि अहिलेसम्म ३ अर्बभन्दा बढी खर्च भएको जनाएको छ ।
स्वास्थ्य तथा जनसंख्या मन्त्रालयका प्रवक्ता डा। जागेश्वर गौतमलेका अनुसार सरकारले हालसम्म पीसीआर परीक्षणका लागि ३ अर्ब १८ करोड ९४ लाख ४४ हजार ५०० रुपैयाँ खर्च भएको छ ।
उनका अनुसार हालसम्म ५ लाख ७९ हजार ८९९ जनाको पीसीआर परीक्षण गरिएको छ । जस अनुसार एकजनाको पीसीआर परीक्षणका लागि सरकारको ५ हजार ५०० रुपैयाँ खर्च भएको छ ।
यो सरकारले गरेको मात्र खर्चको विवरण हो । पछिल्लो समय कोरोना संक्रमण बढ्दै गएसँगै मानिसहरुले व्यक्तिगत रुपमा आफ्नो खर्चमा पनि पीसीआर परीक्षण गर्दै आएका छन् । मानिसहरुले कति रकम व्यक्तिगत खर्च गरेर कोरोना परीक्षण गरे भन्ने तथ्यांक भने बताइएको छैन ।
यस्तै, एकजना कोरोना संक्रमित भेटाउन सरकारले १ लाखभन्दा बढी खर्च गरेको जनाएको छ । प्रवक्ता गौतमका अनुसार सरकारले एकजना संक्रमितको कन्ट्रयाक ट्रेसिङ गरी परीक्षण गर्दा समेत प्रतिव्यक्ति ४ हजार ६३० रुपैयाँ खर्च हुने गरेको छ ।
