काठमाडौं । पछिल्लो समय सेयर बजारमा प्राथमिक साधरण सेयर (आइपीओ) जारी हुने क्रम ह्वात्तै बढेको छ ।
साधरण सभाबाट पारित भएका तथा धितोपत्र बोर्डले सर्वसाधरणमा सेयर जारी गर्न अनुमति दिएका विभिन्न कम्पनीहरुले धमाधम आइपीओ जारी गर्न थालेका हुन् ।
यसै बीचमा यही भदौ ४ गतेदेखि एकैसाथ दुई कम्पनीले आइपीओ जारी गर्ने भएका छन् । जसमा रिलायन्स लाइफ इन्स्योरेन्स र समाज लघुवित्तले करिब ६४ लाख कित्ता आइपीओ जारी गर्न लागेका हुन् ।
रिलायन्स लाइफ इन्स्योरेन्सले ६३ लाख कित्ता जारी गर्ने
रिलायन्स लाइफले हाल कायम जारी पूँजीको ३० प्रतिशत सेयर सर्वसाधरणमा जारी गर्न लागेको हो । कम्पनीले १०० रुपैयाँ अंकित दरमा ६३ करोड रुपैयाँ बराबरको ६३ लाख कित्ता आइपीओ निष्काशन गर्ने भएको छ ।
निष्काशित गरिने कुल सेयरमध्ये ५ प्रतिशत (३ लाख १५ हजार) कित्ता सामूहिक लगानी कोषका लागि र अर्को ५ प्रतिशत कर्मचारीहरुका लागि सुरक्षित गरिएको छ। सर्वसाधारणले बाँकी ५६ लाख ७० हजार कित्ताका लागि आवेदन दिन सक्नेछन्।
लगानीकर्ताले यस आइपीओमा छिटोमा भदौ ८ गतेसम्म आवेदन दिन सक्नेछन्। सो अवधिसम्ममा सम्पूर्ण सेयरका लागि आवेदन नपरेमा भदौ २२ गतेसम्म आवेदन दिन सक्नेछन् ।
लगानीकर्ताले न्यूनतम १० कित्तादेखि अधिकतममा ६३ हजार कित्तासम्म आवेदन दिन सक्नेछन्। इन्स्योरेन्सको धितोपत्र निष्काशन तथा बिक्री प्रबन्धक सानिमा क्यापिटल लिमिटेड रहेको छ।
लगानीर्ताहरुले नेपाल धितोपत्र बोर्डबाट सी-आस्वा अनुमति पाएका बैंक तथा वित्तीय संस्था र मेरो सेयरमार्फत आवेदन दिन सक्नेछन्।
इन्स्योरेन्सले निष्काशन गर्न लागेको आइपीओलाई इक्रा नेपालले ग्रेड ४ रेटिङ दिएको छ। यसले इन्स्योरेन्सको आधारभूत अवस्था औषतभन्दा कमजोर रहेको संकेत गर्दछ।
इन्स्योरेन्सको अधिकृत पूँजी ३ अर्ब र जारी पूँजी २ अर्ब १० करोड रूपैयाँ छ। १ अर्ब ४७ करोड रूपैयाँ संस्थापक सेयरधनीबाट चुक्ता पूँजी कायम गरिसकेको इन्स्योरेन्सले ६३ करोड रुपैयाँ बराबरको आईपीओ निष्काशन गर्न लागेको हो। आइपीओ निष्काशन पछि इन्स्योरेन्सको चुक्ता पूँजी २ अर्ब १० करोड पुग्नेछ।
समाज लघुवित्तकोे ८६ हजार कित्ता
समाज लघुवित्त वित्तीय संस्था लिमिटेडले पनि भदौ ४ गतेदेखि नै प्रतिकित्ता १०० दरमै ८६ लाख रुपैयाँ बराबरको ८६ हजार कित्ता आइपीओ निष्काशन गर्ने भएको छ ।
यसमध्ये लघुवित्तले १ हजार कित्ता कर्मचारीका लागि र ५ प्रतिशत अर्थात ४ हजार ३०० कित्ता सेयर सामूहिक लगानी कोषका लागि छुट्याएको छ। बाँकी ८० हजार ७०० कित्ता सेयरका लागि सर्वसाधारणले आवेदन दिन सक्नेछन्।
इच्छुक लगानीकर्ताले न्यूनतम १० कित्तादेखि अधिकतममा ५ हजार कित्तासम्मका लागि आवेदन दिन सक्नेछन्। निष्काशन बन्द छिटोमा भदौ ८ गते हुनेछ भने ढिलोमा भदौ १८ गते हुनेछ।
लघुवित्तको धितोपत्र निष्काशन तथा बिक्री प्रबन्धक सिद्धार्थ क्यापिटल लिमिटेड रहेको छ। सर्वसाधारणले नेपाल धितोपत्र बोर्डबाट सी–आस्वा अनुमति प्राप्त बैंक तथा वित्तीय संस्था र मेरोसेयर मार्फत आवेदन दिन सकिनेछ।
