काठमाडौं । कोरोना महामारीका कारण अन्तरराष्ट्रिय बजारमा अस्थिर रहेको सुनचाँदीको मूल्य स्थानीय बजारमा आज अप्रत्यासित रुपमा बढेको छ ।
बुधबार प्रतितोला १ लाख १ हजार ४०० मा कारोवार भएको पहेँलो धातुमा आज १हजार १०० ले वृद्धि भएको छ । बजार खुल्नेबित्तिकै छापावाल सुनको मूल्य प्रतितोला १ लाख २ हजार ५०० कायम भएको छ भने सोही परिमाणको तेजाबी सुनको मूल्य १ लाख २ हजार २०० निर्धारण गरिएको छ ।
नेपाल सुनचाँदी व्यवसायी महासङ्घका अनुसार बुधबारको तुलनामा आज चाँदीको मूल्य तोलाको ५० रुपैयाँले बढेको छ । एक तोला सेतो धातुको मूल्य आज १ हजार ३४५ निर्धारण भएको छ ।
कोभिड–१९ को सङ्क्रमण रोक्न लकडाउन यता मात्रै सुनको भाउ तोलाको २५ हजार रुपैयाँले बढेको छ । लकडाउनकै बीच जेठ २५ गते एक तोला सुनको मूल्य १० हजार ४०० ले बढेर ८७ हजार रुपैयाँ पुगेको थियो । त्यसयता सुनको मूल्य निरन्तर उकालो लागिरहेको छ ।
