काठमाडौं । आइतबार करिब ४३ अंकले घटेको सेयर बजारमा आज सुधार देखिएको छ । बजार खुलेदेखि उतरचढाव देखिएको बजार अन्त्यमा हरियो भएर बन्द भएको हो । आज सूचकमा सुधार भए पनि कारोबार रकममा भने गिरावट आएको छ ।
आज सेयर बजार मापक सूचक नेप्से ७.५९ अंकले बढेर १४०३.८६ बिन्दुमा आइपुगेको छ । यसदिन १९० कम्पनीको १ अर्ब २९ करोड २ लाख २२ हजार २१३ रुपैयाँ बराबरको कारोबार भएको छ । ५३ लाख ४२ हजार ८५१ कित्ता सेयर किनबेच भएका छन् ।
आज कारोबारमा आएका १२ वटा समूहमध्ये ९ समूहको परिसूचक उकालो लागेको छ भने ३ समूहको परिसूचक घटेको छ । जीवन बीमा समूहको परिसूचक सबैभन्दा धेरै ५८.७४ अंकले बढेको छ भने हाइड्रोपावर समूहको ३.५२ अंकले घटेको छ ।
कोराबार रकमका आधारमा आज प्रभु बैंकको प्रमोटर सेयर शीर्ष स्थानमा रह्यो । यसको ३४ करोड २९ लाख रुपैयाँ भन्दा बढीको सेयर किनबेच भएको छ । कारोबारकै आधरमा नेपाल पुनर्बीमा र नेपाल लाइफ इन्स्योरेन्स र क्रमशः दोस्रो र तेस्रो स्थानमा रहे ।
आज ३ वटा कम्पनीको मूल्यमा पोजेटिभ सर्किट लागेको छ । बढ्दो बजारमा आरम्भ चौतारी लघुत्ति, अजोड इन्स्योरेन्स र नेपाल फाइनान्सको सेयर मूल्य करिब १० प्रतिशतले बढेको छ ।
आज दिव्यश्वरी हाइड्रोपावरको सेयर मूल्य सबैभन्दा धेरै ६.९० प्रतिशतले घटेको छ ।
