काठमाडौं । भैरहवामा निर्माणधीन गौतमबुद्ध अन्तर्राष्ट्रिय विमानस्थल निर्माण ताकिएको समयमा पूरा नभएपछि पुनः म्याद थप्ने तयारी गरिएको छ ।
चाथौ पटक थपिएको म्याद अनुसार विमानस्थल निर्माण सन् २०२० को मार्च ३० सम्म सम्पन्न गर्नुपर्ने थियो । तर, कोरोनाका कारण नियमित काम गर्न नसकिएपछि आयोजनाको पाँचौ पटिक म्याद थप्ने तयारी गरिएको छ ।
कोरोनाका कारण गति लिन नसकेको विमानस्थल निर्माण पूरा गर्न थप म्याद थपको प्रक्रिया अघि बढाइएको छ । नागरिक उड्डयन प्राधिकरणले २०२० डिसेम्बर अन्तिमसम्मका लागि म्याद थपको प्रस्ताव गरेको छ । सुरुमा सो विमानस्थल २०१८ सम्ममा उडान सुरु गर्ने लक्ष्य राखिएको थियो । विभिन्न कारण देखाउँदै पटक पटक म्याद थपिएको विमानस्थल निर्माणको कोरोना कारण देखाउँदै पुनः म्याद थप्ने तयारी गरिएको हो ।
विमानस्थल निर्माण गत चैत्र महिनासम्ममा सम्पन्न गर्ने लक्ष्य राखिएको थियो । हालसम्म विमानस्थल निर्माणका क्रममा रनवे, टर्मिनल भवन, प्रशासन भवन, कन्ट्रोल टावर, ट्याक्सीवे र पार्किङ जस्ता ठूला निर्माण कार्यहरू हालसम्म सम्पन्न भइसकेका छन् ।
विमानस्थल निर्माणका क्रममा अहिलेसम्म ६ अर्बका हाराहारीमा भुक्तानी खर्च भइसकेको प्राधिकरणका प्रवक्ता राजकुमार क्षेत्रीले बताए । विमानस्थल निर्माणका लागि ६ अर्ब २२ करोड विनियोजन गरिएको थियो । उनले मुआब्जा बाहेक ६ अर्ब हाराहारीमा रकम भुक्तानी भएको बताएका हुन् ।
यस्तै लकडाउनका कारण चिनियाँ कामदारहरु नेपाल आउन नपाएकाले पनि कतिपय कामहरु रोकिन पुगेको उनले बताए । ‘लकडानका कारण तोकिएको समयमा पूरा गर्न सकिएन, हाल म्याद थपको प्रकृयामा छौँ,’ क्षेत्रीले चाणक्य पोष्टसँग भने ।
उनका अनुसार हाल लकडाउन खुल्यो भने पनि पूर्णरुपमा खुल्ला नभएकाले कामदारहरु आउन नपाएको बताए । अब लकडाउन पूरै खुलाएर सबै कामदारले काम गर्दा ३ देखि ४ महिनामा निर्माण सम्पन्न हुने उनले बताए । ‘फिजिकल काम सबै सकिसकेको छ, लाइट, मार्बल लगाउने लगायतका काम मात्र बाँकी हुन, केही चिनियाँ कामदारहरुले पनि काम गर्नु पर्ने भएकाले उनीहरु फर्किए पछि चाँडै सकिने छ,’ क्षेत्रीले भने ।
गौतम बुद्ध अन्तर्राष्ट्रिय विमानस्थलमा लकडाउनकै अवस्थामा पनि निरन्तर काम भने भइरहेको थियो । हाल विमानस्थलमा एसी जडान, टर्मिनल हाउस फिनिसिङ, धावनमार्ग र ट्याक्सी वेमा केवल जडान, नाला बनाउने लगायतका कामहरु भइरहेको छ ।
विमानस्थल निर्माणको काम दुई भागमा भइरहेको छ । आईसीबी १ र आईबीसी २ गरी दुई भागमा विमानस्थल निर्माणको काम भइरहेको छ । चिनबाट आउन बाँकी केही जनशक्तिका कारण समेत निर्माण कामले गति लिन नसकेको उनले बताए । आईबीसी २ अन्तर्गतको काम चिनियाँ जनशक्तिले गर्ने हुँदा उक्ता काममा असर परेको हो ।
९ प्रतिशत काम धेरै जसो बेसिक उपकरण जडान लगायतका कामहरु बाँकी रहेको छ । चीनबाट आउने उपकरणहरु समेत बनिसकेको र त्यो ल्याउन मात्र बाँकी रहेको उनले बताए । सो उपकरणहरु ल्याउन नपाउँदा समेत कामहरु रोकिन पुगेको छ ।
विमानस्थल निर्माण गत चैत्र महिनासम्ममा सम्पन्न गर्ने लक्ष्य राखिएको थियो । हालसम्म विमानस्थल निर्माणका क्रममा रनवे, टर्मिनल भवन, प्रशासन भवन, कन्ट्रोल टावर, ट्याक्सीवे र पार्किङ जस्ता ठूला निर्माण कार्यहरू हालसम्म सम्पन्न भइसकेका छन् ।
हाल विमानस्थलमा आन्तरिक काम, आवश्यक उपकरणको स्थापना, प्रकाश प्रणालीको काम, भित्री सजावटसँग सम्बन्धित कामहरू चलिरहेको छ ।
सो विमानस्थल निर्माणका क्रममा करिब १५ बिघा जमिन अधिग्रहण भएको छ । मुआब्जा वितरणमा २३ अर्ब रुपैयाँ लाग्ने बताइएको थियो। त्यसमध्ये अहिलेसम्म २१ अर्ब ५० करोड रुपैयाँ वितरण गरिसकिएको छ । विमानस्थल निर्माण गर्दा १ हजार ७ सय ४० परिवारको घरजग्गा अधिग्रहण गरिएको छ ।
सञ्चालनपछि यस विमानस्थलले दैनिक १६ हजार यात्रुलाई सेवा दिने लक्ष्य राखिएको छ ।
