काठमाडौं । नेपाल राष्ट्र बैंकले सेयर धितोमा ७० प्रतिशत ऋण पाउने व्यवस्था कार्यान्वयनमा ल्याउन बैंक तथा वित्तीय संस्थालाई निर्देशन दिएको छ ।
नेपाल राष्ट्र बैंकले यही साउन २ गते सार्वजनिक गरेको चालू आवको मौद्रिक नीति कार्यान्वयन गर्न जारी गरेको एकीकृत निर्देशिका अनुसार सेयर प्रमाणपत्र धितोमा राखेर ७० प्रतिशत ऋण लिन पाउने व्यवस्था गरेको हो ।
यस्तो व्यवस्था यसअघि ६५ प्रतिशत मात्रै थियो । चालू आवको मौद्रिक नीतिले उक्त सीमालाई ५ प्रतिशतले बढाएर ७० प्रतिशत पुर्याएको हो ।
सो व्यवस्थाले सेयर बजार थप विस्तार हुने विश्वास लिइएको छ । एकीकृत निर्देशिका अनुसार कुल १८० दिनको अन्तिम मूल्यका आधारमा दिइने ऋणलाई १२० दिनको अन्तिम मूल्यका आधारमा दिने व्यवस्था गरिएको छ । यस्तै, सेयर कर्जा प्रतिग्राहक बढीमा ५० लाख रुपैयाँसम्म मात्र दिन पाइने व्यवस्था गरिएको छ ।
राष्ट्र बैंकले ओभरड्राफ्टलाई यथावत राख्दै धितो कर्जा, सम्पत्ती कर्जा, व्यक्तिगत आवधिक कर्जाको सीमा पनि ५० लाख रुपैयाँ बराबर तोकिदिएको छ ।
यदि कुनै ऋणीले ५० लाख रुपैयाँभन्दा बढी दिएको भए २०७९ असार मसान्तभित्र सीमामा ल्याउनुपर्ने व्यवस्था गरिएको छ ।
