काठमाडौं । नेपाल पुनर्बीमा कम्पनीले सेयरधनीलाई लाभांश नदिने भएको छ ।
बिहीबार बसेको कम्पनीको सञ्चालक समितिको बैठकले आर्थिक वर्ष २०७५/७६ को मुनाफाबाट सेयरधनीहरूलाई लाभांश नदिने निर्णय गरेको हो ।
कम्पनीले पुनर्बीमा व्यवसाय (व्यवस्था तथा सञ्चालन) निर्देशका २०७१ को दफा १२ को कारण लगानीकर्तालाई नगद लाभांश तथा बोनस सेयर वितरण गर्न नमिल्ने जनाएको छ ।
उक्त दफा अनुसार पुनर्बीमाले आफ्नो व्यवसाय गर्दा बचत भएको रकम कम्तीमा ५ वर्षसम्म मुनाफाका रूपमा बाँडफाँड नगरी अनिवार्य रूपमा जगेडा कोषमा राख्नुपर्ने व्यवस्था छ । सोही अनुसार कम्पनीले गत आवको नाफाबाट लाभांश नबाँडी जगेडा कोषमा राख्ने भएको हो ।
२०७१ सालदेखि व्यवसाय सुरु गरेको कम्पनी संचालनमा आएको गत आर्थिक वर्ष २०७६/७७ मा ५ वर्ष पुगेको छ । यससँगै कम्पनीले गत वर्षको लाभांश भने सक्नेछ ।
गत वर्ष कम्पनीले सर्वसाधरणलाई १ अर्ब ६० करोड रुपैयाँ बराबरको आइपीओ जारी गरेको थियो । गत असार १५ गतेदेखि दोस्रो बजारमा कारोबारमा आएको कम्पनीको सेयर मूल्य ३ साताको अवधिमै करिब दोब्बरले बढेको छ । अहिले कम्पनीको सेयर मूल्य प्रतिकित्ता ५५० रुपैयाँभन्दा माथि छ ।
