काठमाडौं । सोमबार सेयर बजारमा तीव्र उतरचढाव देखिएको छ । आज बजार खुलेको ५३ सेकेन्डमै ६० अंकले बढेर पहिलो सर्किट लागेको थियो । त्यसपछि पुनः खुलेको बजार पनि ३५ सेकेन्डमै दोस्रोे सर्किट लागेको बजार अन्तयमा दोहोरो अंकले घटेर बन्द भएको छ ।
सेयर बजार मापक सूचक नेप्से १४.९ अंकले घटेर १४६४.९४ विन्दुमा आइपुगेको छ । आज १८० कम्पनीको २ अर्ब ८० करोड २२ लाख ३३ हजार ७१५ रुपैयाँ बराबरको कारोबार भएको छ । ७० लाख १ हजार २५८ कित्ता सेयर किनबेच भएको छ ।
आज कारोबार भएका १२ वटा समूहमध्ये ४ समूहको परिसूचक उकालो लागेका छन् भने ८ समूहको परिसूचक ओरालो लागेका छन् । आज सबैभन्दा धेरै विकास बैंक समूहको परिसूचक १६.९३ अंकले बढेको छ भने जीवन बीमा समूहको परिसूचक १८८.६५ अंकले घटेको छ ।
आज कारोबार रकमका आधारमा एनएमबी बैंक शीर्ष स्थानमा रहेको छ । यसको २० करोड १४ लाख ९९ हजार ५१६ रुपैयाँको कारोबार भएको छ । कारोबार रकमकै आधारमा नेपाल पुर्नबीमा कम्पनी र एनआइसी एशिया बैंकको सेयर क्रमशः दोस्रो र तेस्रो स्थानमा रहे । यी दुवै कम्पनीको १७ करोड भन्दा बढीको कारोबार भएको छ ।
आज पाँच कम्पनीको सेयर मूल्यमा सकारात्मक सर्किट लागेको छ । युनाइटेड फाइनान्स, एनआइसी एशिया लघुवित्त र स्पर्श लघुवित्तको सेयर मूल्यमा पोजेटिभ सर्किट लागेको छ । यी कम्पनीको मूल्य करिब १० प्रतिशतले बढेको छ ।
आज गुँरास लघुवित्त र मञ्जुश्री फाइनान्सको सेयर मूलयमा नेगेटिभ सर्किट लागेको छ । यी कम्पनीको मूल्य करिब १० प्रतिशतले घटेको छ ।
