बाढीका कारण दर्जनबढी हाइड्रोपावरमा क्षति, ५०० मेगावाट विद्युत् उत्पादन बन्द
चाणक्य पोष्ट
प्रकाशित : 12:36 pm, शुक्रबार, असार २६, २०७७

काठमाडौं । बिहीबारदेखि परेको अविरल वर्षाका कारण देशका विभिन्न नदीमा आएको बाढीले एक दर्जनभन्दा बढी हाइड्रोपावरमा क्षति पुगेको छ ।

 

बाढीले नेपाल विद्युत प्राधिकरण र निजी क्षेत्रको स्वामित्वका विभिन्न जलविद्युत् आयोजनामा क्षतिपुग्दा करिब ५०० मेगावाट विद्युत् उत्पादन बन्द भएको प्राधिकरणले जनाएको छ ।

 

प्राधिकरणका अनुसार  बाढीका कारण हाल देशमा उत्पादन हुने कुल बिजुलीको ४० प्रतिशत उत्पादन बन्द भएको छ । बाढीका कारण देशकै सबैभन्दा ठूलो १४४ मेगावाटको कालीगण्डकी ‘ए’मा शुक्रबार बिहानदेखि उत्पादन बन्द भएको छ ।

 

त्यस्तै, ७० मेगावाटको मध्यमस्र्याङदी, ४५ मेगावाटको माथिल्लो भोटेकोशी, १६ मेगावाटको त्रिशूली, १४ मेगावाटको देवीघाट, ६ मेगावाटको पुवाखोला जलविद्युत् लगायत दर्जन बढी आयोजनामा गरी करिब ५०० मेगावाट बिजुली उत्पादन बन्द भएको छ ।

 

यी आयोजनाहरु मध्ये केही बाढीको वहाव उच्च भएकाले बन्द गरिएको हो भने केहीको पावर हाउसमै क्षति पुगेर बन्द भएका हुन् । बाढीका कारण कुन आयोजनाको कति क्षति भयो भन्ने विवरण नआएपनि अर्बौं क्षति पुगेको अनुमान गरिएको छ ।

 

यस्तै भारी वषाका कारण आएको पहिरोले देशका विभिन्न प्रसारण लाइनमा क्षति पुर्याएको छ । जसका कारण विभिन्न स्थानमा विद्युत् सेवा अबरुद्ध भएको छ ।

 

वर्षाका कारण १३२ केभी काबेली कोरिडोर प्रसारण लाइनमा क्षति पूग्दा यसमा जोडिएको १५० मेगावाट विद्युत प्रणालीबाट विच्छेद हुन पुगेको छ ।त्यस्तै, चमेलिया मर्स्याङ्दी करिडोर प्रसारण लाइनमा पनि पहिरोका कारण समस्या आएर बन्द भएको छ ।

 

४० प्रतिशत विद्युत् उत्पादन भएपछि न्यूनतम माग धान्न भारतबाट थप बिजुली आयात गर्ने तयारी भइरहेको प्राधिकरणले जनाएको छ ।
प्राधिकरणका अनुसार कटैया, ढल्केबर प्रसारण लाइनबाट थप बिजुली आयात गरी वितरण गरिने विद्युत् आपूर्तिको व्यवस्था गरिने छ ।