काठमाडौं । गतसाता सर्किटै सर्किट लागेको सेयर बजार आज सामान्य देखिएको छ । पछिल्ला ३ दिन सर्किट लागेर पूरै अवधि कारोबार नभइ बन्द भएको बजार आइतबार सामान्य अंकले बढेर बन्द भएको छ ।
सेयर बजार मापक सूचक नेप्से ९.३५ अंकले बढेर १२६५.४५ विन्दुमा पुगेको छ । आज १७२ कम्पनीको १ अर्ब ३ करोड ३३ लाख ९० हजार २३१ रुपैयाँ बराबरको कारोबार भएको छ । २८ लाख ६ हजार ८९८ कित्ता सेयर खरिदबिक्री भएका छन् ।
कारोबार भएका १२ वटा समूहमध्ये ५ वटा समूहको परिसूचक ओरालो लागेका छन् भने बाँकी ७ समूहको परिसूचक उकालो लागेका छन् । आज सबैभन्दा धेरै जीवन बीमासमूहको परिसूचक २१९.३९ अंकले बढेको छ भने व्यापार समूह ७५.२३ अंकले घटेको छ ।
कारोबार रकमको आधारमा नेपाल पुनर्बीमा कम्पनीको सेयर शीर्ष स्थानमा रह्यो । यसको १५ करोड १२ लाख ४१ हजार ९८७ रुपैयाँको कारोबार भएको छ । कारोबारकै आधारमा नेपाल लाइफ इन्स्योरेन्स र नबिल बैंक क्रमशः दोस्रो र तेस्रोमा रहेका छन् ।
आज ४ कम्पनीको मूल्यमा सर्किट लागेको छ । सूर्योदय लघुवित्त र जनउत्थान सामुदायिक लघुवित्तको सेयर मूल्यमा पोजेटिभ सर्किट लागेको छ । यी कम्पनीको सेयर मूल्य करिब १० प्रतिशतले बढेको छ ।
यस्तै, साल्ट ट्रेडिङ कर्पोरेशन र सेन्ट्रलर फाइन्सान्सको सेयर मूल्यमा नेगेटिभ सर्किट लागेको छ । यी कम्पनीको मूल्य ठ्याक्कै १० प्रतिशतले घटेको छ ।
