काठमाडौं । सोमबार दोहोरो अंकले घटेर बन्द भएको सेयर बजार मंगलबार कारोबार सुरु भएको सवा २ घण्टामै पोजेटिभ सर्किट लागेर बन्द भएको छ ।
कारोबार खुलेदेखि लगातार उकालो लागेको बजार सवा २ घण्टामा तेस्रो पोजेटिभ सर्किट लागेर बन्द भएको हो ।बजार खुलेको सवा दुई घण्टामै नेप्से सूचक ६ प्रतिशत अर्थात ७२.०५ अंकले बढेर १२६०.७५ विन्दुमा पुगेर दिनभरका लागि कारोबार बन्द भएको हो ।
मंगलबार बजार खुलेको ४८ मिनेटमै ४ प्रतिशतले बढेपछि सर्किट लागेर २० मिनेटका लागि कारोबार स्थगन भएको थियो । त्यसपछि पुनः खुलेको कारोबार १० मिनेट नबित्दै ५ प्रतिशतले बढेपछि दोस्रो सर्किट लागेर ४० मिनेटका लागि कारोबार रोकिएको थियो ।
नेप्सेको नियम अनुसार कारोबार सुरु भएको १ घण्टाभित्र नेप्से ४ प्रतिशतले घटेमा वा बढेमा २० मिनेटसम्मका लागि कारोबार स्थगित हुने व्यवस्था छ ।
त्यस्तै, पुनः कारोबार सुरु भएको एक घण्टाभित्र ५ प्रतिशतले बढेमा वा घटेमा ४० मिनेट कारोबार स्थगित हुनेछ। परिसूचकमा ६ प्रतिशतको अन्तरपछि त्यस दिनका लागि नै कारोबार स्थगित हुनेछ।
२ दर्जन कम्पनीको मूल्यमा सर्किट
सर्किट लागेर बन्द भएको बजारमा १३४ कम्पनीको २२ करोड ७२ लाख १२ हजार १९४ रुपैयाँ बराबरको कारोबार भएको छ । ४ लाख ८९ हजार ५३७ कित्ता सेयर खरिद-विक्री भएका छन् ।
आज करिब २ दर्जन कम्पनिको सेयर मूल्यमा सर्किट ब्रेक लागेको छ । आज नागरिक लगानी कोष, नेपाल लाइफ, एशियन लाइफ, सूर्यलाइफ लगायत डेढ दर्जनभन्दा बढी कम्पनीको सेयर मूल्यमा पाजेटिभ सर्किट लागेको छ ।
त्यस्तै, आज नेपाल पुनर्बीमा कम्पनी र अओरेन्टल होटलको सेयर मूल्यमा नेगेटिभ सर्किट लागेको छ । यी कम्पनीको सेयर भाउ करिब १० प्रतिशतले घटेको छ ।
कारोबार भएका १२ वटा समूहमध्ये १० समूहको परिसूचक उकालो लागेका छ भने बाँकी २ समूहको सूचक ओरालो लागेको छ । आज जीवन बीमा समूहको सूचक सबैभन्दा धेरै ६३४.९८ अंकले बढेको छ भने होटल समूहको सूचक ४७.८७ अंकले घटेको छ ।
कारोबार रकमको आधारमा हिमालय डिस्ट्रिलरीको सेयर शीर्ष स्थानमा रह्यो । यसको ३ करोड ६४ लाख ८० हजार ६० रुपैयाँको कारोबार भएको छ । कारोबारकै आधारमा नेपाल लाइफ इन्स्योरेन्स र साना किसान विकास बैंकको सेयर क्रमशः दोस्रो र तेस्रोमा रहेका छन् ।
