काठमाडौं । सोमबार दोहोरो अंकले घटेर बन्द भएको सेयर बजार मंगलबार (आज) कारोबार खुलेको १ घण्टा नबित्दै पोजेटिभ सर्किट लागेको छ ।
डेढमहिनापछि खुलेको बजारको दोस्रो कारोबार दिनको ४८ मिनेटमै ४ प्रतिशतले बढेपछि सर्किट लागेर २० मिनेटका लागि कारोबार स्थगन भएको छ ।
११ः४८ बजेसम्म नेप्से सूचक ४७.५८ अंक बढेर १२३६.२८ विन्दुमा पुगेको छ। सो अवधिसम्ममा ४ कम्पनीको सेयर मूल्य करिब १० प्रतिशतले बढेको छ भने अधिकांश कम्पनीको सेयर मूल्य उकालो लागेको छ । । यस अवधिसम्ममा साढे १३ करोडभन्दा बढीको कारोबार भएको छ ।
नेप्सेको नियम अनुसार कारोबार सुरु भएको १ घण्टाभित्र नेप्से ४ प्रतिशतले घटेमा वा बढेमा २० मिनेटसम्मका लागि कारोबार स्थगित हुने व्यवस्था छ ।
त्यस्तै, पुनः कारोबार सुरु भएको एक घण्टाभित्र ५ प्रतिशतले बढेमा वा घटेमा ३० मिनेट कारोबार स्थगित हुनेछ। परिसूचकमा ६ प्रतिशतको अन्तरपछि त्यस दिनका लागि नै कारोबार स्थगित हुनेछ।
