काठमाडौं । गत वर्षको तुलनामा यस वर्ष धान रोपाई बढेको छ । कृषि तथा पशुपन्छी विकास मन्त्रालयले दिएका जानकारी अनुसार यस वर्ष धान रोपाई ८.४१ प्रतिशतले वृद्धि भएको छ ।
मन्त्रालयका अनुसार यो वर्ष असार १० गतेसम्ममा देशभरमा २०.०५ प्रतिशत धान रोपाई भएको मन्त्रालयको दाबी छ । गत वर्ष सोही समयमा ११.६४ प्रतिशत धान रोपाई भएको मन्त्रालयको तथ्यांकले देखाएको छ ।
यस अवधिसम्ममा सबैभन्दा बढी प्रदेश ५ मा धान रोपाई भएको तथ्यांकले देखाएको छ । प्रदेश ५ मा ३६.२६ प्रतिशत धान रोपाई भएको हो । गतवर्ष यो अवधिमा सो प्रदेशमा १३ प्रतिशत धान रोपाई भएको थियो ।
सबैभन्दा कम प्रदेश १ मा धान रोपाई भएको छ । प्रदेश १ मा १०.४१ प्रतिशत धान रोपाई भएको हो । गत वर्ष सोही अवधिमा प्रदेश १ मा ९.९७ प्रतिशत रोपाई भएको थियो ।
प्रदेश २ मा असार १० गतेसम्म १५.५३ प्रतिशत धान रोपाइ भएको छ । बागमती प्रदेशमा १८.६८ प्रतिशत धान रोपाई भएको छ । गण्डकी प्रदेशमा १३.७२ प्रतिशत, कर्णाली प्रदेशमा २०.११ प्रतिशत र सुदूरपश्चिम प्रदेशमा २१.४६ प्रतिशत धान रोपाई भएको कृषि मन्त्रालयको तथ्यांकले देखाएको हो ।
गत वर्ष असार १० गतेसम्म प्रदेश १ मा ९.९७, प्रदेश २ मा ५.२०, बागमती प्रदेशमा ६.७१, गण्डकी प्रदेशमा १७.९९, प्रदेश ५ मा १३.९६, कर्णाली प्रदेशमा २६.१३ र सुदूरपश्चिम प्रदेशमा २० प्रतिशत धान रोपाई भएको तथ्यांकमा उल्लेख छ ।
भौगोलिक आधारमा सबैभन्दा बढी उच्च पहाडी भेगमा २६.०७ प्रतिशत धान रोपाई भएको छ । गत वर्ष सोही अवधिमा त्यहाँ २४.९४ प्रतिशत धान रोपाई भएको थियो ।
मध्य पहाडी भेगमा २०.०७ प्रतिशत धान रोपाई भएको छ । गत वर्ष मध्य पहाडमा १६.९१ प्रतिशत धान रोपाई भएको थियो । तराईमा १९.७५ प्रतिशत धान रोपाई भएको छ । गत वर्ष तराईमा ९.११ प्रतिशत धान रोपाई भएको थियो ।
यस वर्ष असार १० गतेसम्ममा २ लाख ७५ हजार २९ हेक्स क्षेत्रफलमा धान रोपाई भइसकेको मन्त्रालयको दाबी छ ।
