काठमाडौं । लकडाउन यता बन्दा रहेको सेयर बजार खुलाउन लगानीकर्ता संघहरुले नेपाल धितोपत्र बोर्डलाई आग्रह गरेका छन् ।
शुक्रबार ६ वटा लगानीकर्ता संघहरुले संयुक्त रुपमा पत्र लेख्दै करिब ३ महिनादेखि बन्द रहेको बजार खुलाउन बोर्डलाई अनुरोध गरेका हुन् ।
अनलाइन कारोबारका लागि विद्युतीय माध्यमबाट भुक्तानी गर्न आवश्यक प्रक्रिया सहज भइसकेकाले यथाशिघ्र बजार खोल्न लगानीकर्ता संघहरुले पत्र लेख्दै बोर्डलाई अनुरोध गरेका हुन् ।
यस्तै, लगानीकर्ता संघहरुले अब उप्रान्त कुनै पनि वाहानामा सेयर बजार बन्द गर्न आन्दोलन नगर्ने समेत प्रतिबद्धता जनाएका छन् ।
नेप्सेको अनलाइन कारोबार प्रणालीमा केही सुधार भएको र विद्यमान अवस्थामा युजरनेम र पासवर्ड प्राप्त गर्ने, तत्कालको लागि नेपाल क्लियरिङ हाउसको कनेक्ट आईपीएस सेवा या उपयुक्त विद्युतीय माध्यम प्रयोग गर्ने व्यवस्था भएपछि बजार पूर्णरुपमा सूचारु हुने सहमती पत्रमा उल्लेख छ ।
सरकारले लकडाउन खुकुलो गरेसँगै असार १ गतेदेखि नै बैंक तथा वित्तीय संस्थाहरु खुले पनि सेयर बजार भने खुल्न सकेको छैन । बजार खुलाउने बारे बोर्ड र नेप्सेले तयारी गरिरहेको बताए पनि अहिलेसम्म कहिलेबाट खोल्ने भन्ने निर्णय भएको छैन ।
बिनाकारण लामो समय सेयर बजार बन्द गर्दा लगानीकर्ताको खर्बौको सम्पत्ति बन्धकी भएको छ भने सरकारले पाउने राजश्व समेत गुमेको छ ।
यसैबीच बोर्डले पनि सेयर बजार खुलाउने विषयमा अध्ययन गर्न गठित समितिले आज सरोकारवालसँग छलफल जारी राखेको छ ।
सरोकारवाला सँगको छलफल पश्चात अध्ययन समितिले बजार के कसरी र कहिलेबाट खुलाउने भन्ने बारेमा अध्ययन प्रतिवेदन दिनेछ । उक्त अध्ययन समितिको प्रतिवेदनका आधारमा बोर्डले बजार संचालन गराउन नेप्सेलाई निर्देशन दिने बताइएको छ ।
