काठमाडौं । नेपाल सरकारको स्वामित्वमा सञ्चालित खाद्य व्यवस्था तथा व्यापार कम्पनी र सस्तोडिल डटकम बीच व्यापार साझेदारी भएको छ।
यस साझेदारीसँगै अब खाद्य व्यवस्था तथा व्यापार कम्पनीको सुपथ मूल्यका सामग्री होम डेलिभरीको काम सस्तोडिलले गर्ने भएको छ । निजी इकमर्स कम्पनीसँग नेपाल सरकारले पहिलोपटक व्यापार साझेदारी गरेको छ।
कोरोनाको महामारीले गर्दा लकडाउन सुरु भए सँगै इकमर्स कम्पनीको माग ह्वात्तै बढेको थियोे। यसै सन्दर्भमा सरकारले इकमर्स सेवा सुरु गरेको थियो।
मोडालिटी अनुसार खाद्य व्यवस्था तथा व्यापार कम्पनी लिमिटेड सस्तोडिलको वेसाइटमा भेन्डरको रुपमा समेटिएको छ। ग्राहकले सस्तोडिलको वेबसाईट वा मोबाइल एप प्रयोग गरी अर्डर गर्न सक्नेछन्। हाल दाल, चामल, नुन, डीडीसीका उत्पादन लगायतका सामग्री सूचीकृत गरिएको छ।
तत्काललाई काठमाडौ उपत्यकाको चक्रपथ भित्र मात्र डेलिभरी हुने बताइएको छ। अर्डर गरेको एक दिन भित्रै डेलिभरी हुने र कम्तीमा २ हजारदेखि बढीमा ५ हजारसम्मको अर्डर गर्न सकिने छ।
