काठमाडौं । निजी लगानीको अन्तर्राष्ट्रिय वायुसेवा कम्पनी हिमालय एअरलाइन्सले आजबाट बंगलादेशको राजधानी ढाका उडान सुरु गरेको छ । बङ्गलादेशी पर्यटकको नेपाल आगमन सहजतालाई लक्षित गर्दै कम्पनीले आजबाट काठमाडौँ–ढाका सिधा उडान सुरु गरेको हो ।
कम्पनीका अनुसार एचनाइन ६७८ काठमाडौँबाट स्थानीय समय ११:१० मा उडान गरेको छ । सो जहाज स्थानीय समय १३:१० मा ढाकाको हजरत शाहजलाल अन्तर्राष्ट्रिय विमानस्थलमा अवतरण गर्नेछ । आजै ढाकाबाट एचनाइन ६७९ जहाजले स्थानीय समय २:१० मा उडान गरी काठमाडौँमा दिउँसो ३:२० मा अवतरण हुने कम्पनीले जनाएको छ ।
उक्त एयरलाइन्सले १५० इकोनोमी क्लास र आठ वटा प्रिमियम इकोनोमी क्लासको सिट क्षमताको न्यारो बडी जहाज ए ३२०–२१४ विमानबाट ढाका उडान गरेको हो ।
दुईतर्फी उडानमै प्रिमियम इकोनोमी क्लासमा २५ किलोसम्मको ब्यागेज निःशुल्क हुनेछ र इकनोमी क्लासमा २० केजीसम्मका लागि छुट हुने कम्पनीले जनाएको छ । एयरलाइन्ससँग नयाँ एयरबस ३२०–२०० को तीन वटा जहाज छन् ।
बंगलादेश र नेपालका व्यावसायिक यात्रु तथा घुमघाममा जाने यात्रु यस उडानबाट लाभान्वित हुने कम्पनीले उल्लेख गरेको छ । बंगलादेश धेरै नेपाली विद्यार्थी भएको मुलुक पनि हो । बंगलादेशबाट पनि ठूलो संख्यामा पर्यटन नेपाल भ्रमणमा आउने गरेका छन् ।
काडमाडौं–ढाका–काठमाडौं रुटमा सातामा तीन उडान तालिका रहेको छ । सोमबार, बुधबार र शनिबार हिमालय एयरलाइन्सको जहाज ढाकाका लागि उड्नेछ ।
हिमालय एअरलाइन्सले मध्यपूर्वी एसियाका गन्तव्य दोहा, दुबई/आबुधावी र दमाममा अन्तर्राष्ट्रिय उडान गरिरहेको छ । कम्पनीले निकट भविष्यमा चीनको बेइजिङलाई आफ्नो सञ्जालमा जोड्ने र नाङचाङ, चाङ्चिङ, चाङ्सा र गुइयङजस्ता गन्तव्यसम्म उडान विस्तारको योजना रहेको उल्लेख गरेको छ ।