काठमाडौं । लकडाउनको प्रत्यक्ष प्रभाव बैंक तथा वित्तीय संस्थाको कर्जा प्रवाहमा देखिएको छ । लकडाउनको अवधि साढे २ महिनामा निक्षेप संकलनमा खासै असर नपरे पनि कर्जा प्रवाहमा ठूलो असर परेको छ ।
नेपाल राष्ट्र बैंकका अनुसार लकडाउन शुरु भएदेखि यता जेठ २४ गतेसम्मको अवधिमा बैंक तथा वित्तीय बैंकिङ प्रणालीमा करिब सवा १ खर्ब निक्षेप संकलन भएको छ ।
वाणिज्य बैंक, विकास बैंक र फाइनान्स कम्पनीले लकडाउन शुरु भएदेखि २४ जेठसम्ममा १ खर्ब २७ अर्ब रुपैयाँ निक्षेप संकलन गरेको नेपाल राष्ट्र बैंकले जनाएको छ ।
राष्ट्र बैंकका अनुसार चैत दोस्रो सातासम्म बैंक तथा वित्तीय संस्थाहरुमा ३५ खर्ब ९४ अर्ब रुपैयाँ निक्षेप रहेकोमा २४ जेठसम्म आइपुग्दा यो १ खर्ब २७ अर्बले बढेर ३७ खर्ब २१ अर्ब रुपैयाँ पुगेको छ ।
लकडाउनमा निक्षेप संकलन बढे पनि कर्जा लगानी भने ह्वात्तै घटेको छ । करिब २ महिनाभन्दा लामो समयमा जम्मा ११ अर्ब रुपैयाँमात्रै ऋण लगानी भएको राष्ट्र बैंकले जनाएको छ ।
११ चैतसम्ममा बैंक तथा वित्तीय संस्थाहरुको ३२ खर्ब १८ अर्ब रुपैयाँ कर्जा लगानी गरेका थिए भने जेठ २४ सम्म बढेर ३२ खर्ब २९ अर्ब रुपैयाँ पुगेको छ ।
लकडाउनमा सबै आर्थिक क्रियाकलाप ठप्प भएकाले बैंकहरुमा कर्जा लगानी ह्वात्तै घटेको राष्ट्र बैंकको भनाइ छ । पछिल्लो समय बैंकमा कर्जा लिन आउनेको संख्या अत्यन्तै न्यून रहेको बताइएको छ ।
