काठमाडौं । अब अफ सिजनमा पनि फूलहरु फुलाउन मिल्ने भएको छ । कृषि ज्ञान केन्द्र ललितपुरबाट सञ्चालित सयपत्री फूल उत्पादनका लागि पोली हाउस निर्माणमा सहयोग कार्यक्रम आएको हो । पोली हाउस निर्माण गरी जुन सुकै मौसममा पनि फूल फुलाउन सकिने छ ।
काठमाडौं उपत्यकामा सयपत्रि फूल खेती सिजनमा मात्र गरिने भएकोले धेरै जसो मागको आपूर्ति भारतीय बजारबाट हुने गरेको पाइन्छ ।
काठमाडौं उपत्यकाको हावापानीमा सिजनमा र अफसिजनमा संरक्षित वातावरणमा बाह्रै महीना सयपत्री फूल उत्पादन गर्न सकिने भएकोले पुष्प व्यवसायीलाई यसको खेती गर्न प्रोत्साहित गर्ने गरी यो कार्यक्रम ल्याइएको हो ।
उपत्यकाको दैनिक मागलाई सम्बोधन गर्न ८ हजार ७०० वर्ग मिटर (१७ रोपनी ) क्षेत्रफलबाट १५० क्विन्टल थप सयपत्री फूल उत्पादन गरी ४ लाख माला तयार गरी अयात प्रतिस्थापन गर्ने योजना रहेको छ ।
कृषि ज्ञान केन्द्र ललितपुरले आर्थिक वर्ष २०७६/७७ मा काठमाडौं उपत्यकाको तीन जिल्लामा सयपत्री फूल उत्पादनका लागि पोली हाउस निर्माणमा सहयोग कार्यक्रम अन्तर्गत ८ हजार ७०० वर्ग मीटरमा पोली हाउस निर्माण गर्नको लागि ६९ लाख ६० हजार रुपैयाँ रकम व्यवस्था भएको थियो ।
यस कार्यक्रम संचालनको लागि सूचना प्रकाशित गरी पुष्प व्यवसायीबाट माग संकलन गरेर आएका आवेदनहरु मध्येबाट पुष्प पकेट क्षेत्र छनौट गरी काठमाडौंको दक्षिणकाली नगरपालीका, ललितपुरको गोदावरी नगरपालीका, भक्तपुरको चाँगुनारायण र सूर्यविनायक नगरपालीका क्षेत्रबाट माग आएको थियो ।
सम्भाव्यताको आधारमा ४० वटा प्रस्ताव छनौट गरेर ७५ वर्ग मिटरको ११६ वटा बाँसको प्लाष्टीक घर निर्माण गरी बाह्रै महीना सयपत्री उत्पादन हुने गरी कार्यक्रम सम्पन्नन भएको थियो ।
नेपालमा ३८ जिल्लामा ६०० वटाभन्दा बढी नर्सरी स्थापना भएको छ । त्यसबाट करिब १५० हेक्टरमा फूल खेती भइरहेको छ । नेपालमा विभिन्न फूलको उत्पादन प्रतिवर्ष ३ हजार टन हुने अनुमान रहेको छ ।
यस मध्ये सयपत्री फूल सिजनमा मात्र उत्पादन हुने र प्रतिदिन उपत्यकामा १७ देखि २० हजार मालाको माग हुने गरेको छ । तिहारको ५ दिनमा १५ लाखको हाराहारीमा सयपत्री फूलको मालाको माग हुने तथ्याङ्कले देखाउछ ।
गत आर्थिक वर्ष २०७५/७६ देशैभरी २ अर्ब ४२ करोडको फूलको कारोबार भएको थियो । आर्थिक वर्ष २०७४/७५ को तुलनामा सो १७ करोडले बढी हो ।
