काठमाडौं । सरकारले आगामी आर्थिक वर्षका लागि १४ खर्ब ७४ अर्ब ६४ करोडको रुपैयाँको बजेट ल्याएको छ ।
अर्थमन्त्री डा. युवराज खतिवडाले संघीय संसदको दुवै सदनको संयुक्त बैठकमा आर्थिक वर्ष २०७७/७८ का लागि उक्त रकमको बजेट प्रस्तुत गरेका हुन् ।
सरकारले आगामी वर्ष चालू खर्चका लागि ९ खर्ब ४८ अर्ब रुपैयाँ बजेट विनियोजन गरिएको छ ।
त्यस्तै पूँजीगततर्फ ३ खर्ब ५२ अर्ब ९१ करोड र वित्तीय व्यवस्थातर्फ १ खर्ब ७२ अर्ब विनियोजन गरेको छ ।
सरकारले आगामी वर्ष ८ खर्ब ८९ अर्ब राजस्व संकलन गर्ने लक्ष्य राखेको छ । वैदेशिक ऋणबाट २ खर्ब ९९ अर्ब रुपैयाँ र आन्तरिक ऋणबाट २ खर्ब २५ अर्ब रुपैयाँ उठाउने लक्ष्य राखेको छ ।
