काठमाडौं । रानीपोखरी निर्माण अबको डेढ महिनामा सम्पन्न हुने भएको छ । लकडाउनमा समेत निरन्तर काम भइरहेको रानीपोखरीमा हालसम्म ८५ प्रतिशत काम सम्पन्न भइसकेको आयोजना प्रमुख ध्रुव पौडेलले बताए । उनका अनुसार चालू आर्थिक वर्षभित्रै रानीपोखरी निर्माण सम्पन्न गर्ने गरी तीव्र्र गतिमा काम भइरहेको छ ।
उनले लकडाउनका कारण रानीपोखरी निर्माणमा खासै असर नपारेको बताए । हाल रानीपोखरीमा कालोमाटो बिछ्याएर इँटा राख्ने काम भइरहेको छ । यो काम अन्तिम चरणमा रहेको उनले बताए ।
‘मौसमले धेरै समस्या नदिए यही आवभित्र रानीपोखरी निर्माण सकिन्छ, काम भए अनुसार आशावादी छौँ,’ योजना प्रमुख पौडेलले चाणक्य पोष्टसँग भने ।
यस्तै रानीपोखरी निर्माणका क्रममा बीचमा मन्दिर बनाउने कामले केही समय लिन सक्ने देखिएको उनले बताए । इँटा मिलाउने र मन्दिर बनाउने कामसँगै मन्दिरभित्र बत्ती राख्ने, तथा हरियाली बनाउने काम समेत भइरहेको छ । हाल बत्ती राख्नका लागि पाइप बिछ्याउने काम भइरहेको उनले बताए ।
यी कामहरु सकिए पछि रानीपोखरी भित्र पार्क तथा वरिपरीका क्षेत्रलाई सौन्दर्यरीकरण गरिने काम हुने उनले बताए । त्यसका लागि छुट्टै ठेक्का दिएर आगामी आर्थिक वर्षभित्र हरियाली निर्माण तथा पार्क बनाउने उनले जानकारी दिए । ‘रानीपोखरी भित्रका निर्माण यही आर्थिक वर्षभित्र सक्ने छौँ, त्यसपछि पार्क तथा हरियाली निर्माणको काम आगामी आर्थिक वर्षभित्र सक्ने छौँ,’ पौडेलले भने ।
हालसम्म रानीपोखरी निर्माणका क्रममा १५ करोड रुपैयाँ खर्च भइसकेको छ । विभिन्न निर्माणका काम सम्पन्न नभएसम्म भुक्तानी नगरिने भएकाले बजेट खर्च धेरै नदेखिएको उनले बताए ।
पोखरी निर्माणका लागि मात्र उपभोक्ता समितिलाई ९ करोड ५० लाख रुपैयाँ दिइएको छ भने निर्माण व्यवसायीलाई १५ करोड रुपैयाँ लगानी उपलब्ध गराइएको छ । यसरी रानीपोखरी निर्माणको कुल लगानी २४ करोड रुपैयाँ रहेको छ ।२ लाख २० हजार वर्ग फिटको रानीपोखरीमा कालो माटो र इँटाको प्रयोग गरी पानी अड्याइने छ । यो जिम्मा उपभोक्ता समितिलाई दिइएको छ ।
पोखरीको बाहिरी पर्खालहरूमा फिसबोन स्टाइलमा इँटा बिछ्याएर ट्रयाक बनाइनेछ भने शौचालय, ८ वटा विश्रामस्थल पनि बनाइने छन् ।
२०७२ माघ २ गते राष्ट्रपति विद्यादेवी भण्डारीले रानीपोखरी पुनः निर्माणको शिलन्यास गरेकी थिइन् ।
२०७३ मा वैशाखमा कात्तिकसम्म निर्माण सक्ने गरी ६ करोड २९ लाखमा पोखरीको पुनः निर्माणको ठेक्का लगाइए पनि विभिन्न कारणले अहिलेसम्म निर्माण सम्पन्न हुन सकेको छैन । कोरोना भाइरसको प्रकोप र त्यसपछिको लकडाउनका कारण गति लिन नसके पनि चालू आर्थिक वर्ष भित्र निर्माण पूरा गर्ने लक्ष्य राखिएको छ ।
धरहरा निर्माणका लागि २ अर्ब बजेट आवश्यक
सुरुवातदेखि नै तीव्र गतिमा काम भइरहेको धरहरा पुनःनिर्माण लकडाउन यता काममा सुस्तता आएको छ । पछिल्लो समय जनशक्ति अभावका कारण सुस्त गतिमा धरहरा निर्माण भइरहेको आयोजना प्रमुख ध्रुव पोखरेलले बताए ।
हालसम्म धरहराको १० औँतल्ला ढलानको काम सम्पन्न भएको छ । अन्डग्राउण्डसहित २२ तले धरहरा बन्न लागेको हो । हाल धरहरामा डबल बेसमेन्ट र त्रिपल बेसमेन्टको काम भइरहेको छ ।
धरहरा निर्माण दक्ष कामदारले मात्र गर्न सक्ने भएकाले कतिपय कामदार गाउँ फर्केकाले थोरै जनशक्तिले मात्र कामलाई निरन्तरता दिइरहेको उनले बताए ।
धरहरा पुनर्निर्माणका लागि कुल ३ अर्ब ४२ करोड रुपैयाँ लागत आवश्यक पर्छ । सो मध्ये चालू आवमा १ अर्ब खर्च रुपैयाँ हाराहारी खर्च हुने अनुमान गरिएको छ । आगामी आवमा २ अर्ब ४२ करोड रुपैयाँ बजेट आवश्यक पर्ने छ ।
‘जुन गतिमा हुनु पर्ने त्यो गतिमा काम हुन सकेको छैन,’ पौडेलले भने ‘यसले अझै निर्माणको अवधि बढाउन सक्छ ।’ निर्माण सामग्री समेत ल्याउनमा समस्या भएको उनले बताए । निर्माण सामग्री ल्याउने स्थानमा जनशक्ति नहुँदा सिमेन्ट निकाल्ने हाल्ने मानिसहरु नभएको उनले बताए ।
चिनियाँ निर्माण कम्पनी जीआइइटिसी-रमन जेभीले २०७७ असोज २१ गतेसम्म पार्किङलगायत सम्पूर्ण निर्माणको काम सम्पन्न गरी धरहरा सरकारलाई हस्तान्तरण गर्नुपर्ने छ ।
२ वर्षभित्र निमार्ण सम्पन्न गर्ने लक्ष्यसहित धरहरा पुनर्निर्माण प्रधानमन्त्री केपी शर्मा ओलीले २०७५ पुस १२ गते शिलन्यास गरी औपचारिक रुपमा सुरु गरिएको थियो ।
