काठमाडौं । उपत्यकामा मासुजन्य वस्तुको मूल्य वृद्धि भएको छ । पछिल्लो केही साता कुखुरा, भैँसी, खसी लगायतका मासुको मूल्य वृद्धि भएको हो ।
लकडाउनका कारण उपत्यका बाहिरबाट पर्याप्त मात्रमा मासुजन्य पशुपन्छी आयात नहुँदा बजारमा मासुको माग बढेसँगै मूल्य समेत वृद्धि हुन थालेको व्यवसायीहरु बताउँछन् ।
एक हप्ता अगाडि प्रतिककिलो २५० रुपैयाँ रहेको कुखुराको मासु अहिले ३२० सम्म पुगेको छ भने यो अझै बढ्ने क्रममा छ । यस्तै अण्डाको मूल्य समेत २८० रुपैयाँ प्रतिक्यारेटबाट बढेर ३५० रुपैयाँ पुगेको छ ।
ह्याचरी उद्योग संघका अनुसार लकडाउन यथावत रहने हो भने आगामी एक महिनामा कुखुराको मासुको मूल्य ५०० रुपैयाँ प्रतिकेजीसम्म बढ्न सक्ने अनुमान गरिएको छ ।
संघका अध्यक्ष टिकाराम पोखरेलले ह्याचरी पूरै बन्द भएकाले लकडाउनकै अवस्था रहे र ढुवानीमा सहजता नभए मूल्य अझै बढ्न सक्ने बताए ।‘कुखुराका ह्याचरी बन्द छ, माग उच्च छ, लक डाउन रहने हो र ढुवानीमा सहज नगराउने हो भने, अझै मूल्य वृद्धि हुन सक्छ,’ पोखरेलले भने ।
लकडाउन अगाडी ह्याचरी उद्योगहरूले कुखुराको मूल्य बढाउने मागका क्रममा चल्लाहरू नष्ट गरेका थिए । सो समय कुखुराको उत्पादन घटिसकेको थियो । अब लकडाउनका कारण उद्योगले चल्लाहरूलाई खुवाउने दाना पाइरहेका छैनन् ।
कुखुराको दाना नपाउने र व्यवसाय घाटामा जाने अवस्था देखेपछि व्यवसायहरुले कुखुरको मूल्य बढाउन थालेको पोखरेलले बताए ।
पछिल्लो समय भैँसीको मासु समेत ५०० रुपैयाँ प्रतिकेजी पुगेको छ । विगतमा भैँसीको मासु प्रतिकेजी ४०० रुपैयाँ रहेको थियो । खसीको मासुको मूल्य १४०० रुपैयाँ प्रतिकेजी पुगेको छ । विगतमा खसीको मासु प्रतिकेजी ११०० रुपैयाँ रहेको थियो ।
केही चौपाया व्यवसायीहरुले सिन्डीकेट लगाएर मनोमानी ढंगले मासुको मूल्य बढाएको एक आपूर्ती कर्ताले बताए । उनले सम्बन्धित निकायले मासु व्यापारीको सट्टा जीवित बोका आपूर्तिकर्ताको अनुगमन गर्नुपर्ने बताए ।
विगतका समयमा भारतबाट दैनिक ३ देखि ४ सयको हाराहारीमा खसीबोका आयात हुने गरेको थियो । प्रत्येक सातामा ५ हजारदेखि ५५ सय खसीबोका भारतबाट आयात हुने गरेको थियो ।
भारतबाट वार्षिक सवा ४ अर्ब रुपैयाँको जिउँदो पशु, १८ करोड रुपैयाँको तयारी कच्चा मासु र १ अर्ब ८३ करोड रुपैयाँ बराबरको माछा आयात हुने गरेको थियो ।
