महामारीमा फस्टाएको ‘जुम’, जसको निर्मातालाई अमेरिकाद्धारा ८ पटकसम्म भिसा दिन इन्कार
चाणक्य पोष्ट
प्रकाशित : 12:18 pm, आइतबार, जेठ ४, २०७७

कोरोना महामारीले विश्वमा धेरै प्रकारका व्यवसायलाई व्यापक प्रभाव पारेको छ । कतिपय ठूला कम्पनीहरु नै बन्द भइसकेका वा हुने तरखरमा रहेका छन् । तर, यस्तो प्रतिकूलताका बीचमा पनि केही व्यवसायले भने छलाङ लगाएका छन् ।

 

महामारीको बीचमा त्यस्तै छलाङ लगाउने एक व्यवसाय हो ‘जुम’ । महामारीमा सामाजिक वा भौतिक दूरी कायम गर्नुपर्ने भएपछि धेरै व्यक्तिहरु वा व्यवसायहरुले भर्चुअल बैठक गर्नका लागि यो अनलाइन पूर्वाधारको प्रयोग गर्न थालेका छन् । महामारीको समयमा यो पूर्वाधारको प्रयोग व्यापक मात्रामा बढ्न गएको छ ।

 

अहिलेको समयमा जुम अमेरिकाको सबैभन्दा उदयीमान र राम्रो गरिरहेको कम्पनी हो । गत डिसेम्बरमा १ करोड प्रयोगकर्ता रहेको जुमको अहिले २० करोड प्रयोगकर्ता पुगिसकेका छन् । यो सँगै कम्पनीको सेयर मूल्यमा पनि व्यापक बढोत्तरी भएको छ ।

यो ‘कन्फ्रेन्सिङ’ एप अहिलेको महामारीको सबैभन्दा प्रभावकारी पूर्वाधार भएको छ ।यो एप सन् २०११ मा एरिक युआन नाम गरेका चिनियाँ नागरिकले अमेरिकामा बनाएका हुन् । सन् १९७० मा जन्मेका एरिकलाई अमेरिकाले ८ पटकसम्म भिसा (प्रवेशाज्ञा) दिन इन्कार गरेको थियो ।

 

एरिक अन्तत: अमेरिका जान सफल भएपछि उनले वेबेक्स नाम गरेको कम्पनीमा काम गरे, जुनपछि सिस्कोसँग मर्ज भयो ।

 

जुमले सन् २०१९ मा पब्लिक कम्पनी भएर सर्वसाधारणलाई सेयर बिक्री गरेको थियो । सेयर बिक्री पछिको पहिलो कारोबार दिनमै कम्पनीको सेयर मूल्य ७२ प्रतिशतले बढेको थियो । त्यो दिन कम्पनीको कुल बजार पूँजीकरण १६ अर्ब डलर पुग्यो र एरिक डलर अर्बपति बने ।

 

जुम राम्रोसँग अघि बढिरहेको कम्पनी भए पनि यसरी एकाएक घरायशी नाम बन्ला भनेर चाहिँ कहिल्यै नसोचेको एरिक बताउँछन् । महामारीले अहिले जुमलाई घरायशी नाम बनाइदिएको छ । अहिले एपको बढ्दो मागका कारण आफ्नो जिम्मेवारी बढेको एरिक बताउँछन् । ‘बढ्दो माग पूर्तिको लागि अहिले खटिरहेको छु’, उनी भन्छन् ।

 

जुमलाई लिएर केही विवादहरु नभएका पनि होइनन् । यसको प्रयोगकर्ताका गोपनियताका प्रश्नहरु उठिरहेका छन् । बेलामौका भर्चुअल बैठकहरु चलिरहेको समयमा ह्याकरहरुले भेदभाव पूर्ण अभिव्यक्ति र अश्लिल भिडिया छिराइदिने पनि गरेका छन् ।

 

अमेरिका र चीन बीच तनाव बढिरहेको समयमा जुमको चीनसँगको सम्बन्धलाई लिएर पनि धेरै विवाद हुने गरेका छन्, अमेरिकामा । हाल जुमको प्रधान कार्यालय क्यालीर्फोनियामा रहेको भएपनि चीनका विभिन्न ठाउँमा यो कम्पनीका हजारौं कर्मचारी कार्यरत छन् ।