काठमाडौं । सरकारले आगामी आर्थिक वर्षमा रसुवागढी-काठमाडौं र वीरगञ्ज-काठमाडौं रेलमार्ग निर्माणको थालनी गर्ने भएको छ ।
शुक्रबार सरकारको आगामी आर्थिक वर्षको नीति तथा कार्यक्रम सार्वजनिक गर्दै राष्ट्रपति विद्यादेवी भण्डारीले यी दुवै रेलमार्गको प्रारम्भिक अध्ययन प्रतिवेदन प्राप्त भइसकेकोले अब निर्माणको प्रारम्भिक काम सुरु गर्ने बताएकी हुन् ।
नीति तथा कार्यक्रममा पूर्वापश्चिम रेलमार्गको काँकडभिट्टा-ईनरुवा-खण्डको निर्माणको पनि काम प्रारम्भ गर्ने उल्लेख छ ।
यस्तै, सरकारले बाराको अमलेखगन्जबाट चितवनको लोथरसम्म पेट्रोलियम पाइपलाइन विस्तार गर्ने भएको छ ।
यसअघि भारतको मोतिहारीदेखि बाराको अमलेखगन्जसम्म सफलता पूर्वक पेट्रोलियम पाइपलाइन ल्याइएको भन्दै सरकारले यसलाई आगामी वर्ष थप विस्तार गर्ने योजना राखेको छ ।
