काठमाडौ । राष्ट्रिय सहकारी बैंक र नेपाल बचत तथा ऋण केन्द्रिय सहकारी संघ ( नेफ्स्कून) बिच ब्याजदरमा एकरुपता गर्ने सहमती भएको छ ।
सहकारी बैंक र नेफ्स्कूनले व्याजदरमा एकरुपता गर्ने लगायत विषयमा सहकार्य गर्ने सम्वन्धमा बैशाख १७ गते सहमती पत्रमा हस्ताक्षर समेत गरेका थिए । दुवै संस्थाबिच वित्तिय सहकारीको स्थायीत्व र दिगो संचालनका लागि सहकार्य गर्ने विषयमा सहमती भएको जनाइएको छ ।
दुवै संस्थाले कोरोना संक्रमणका कारण सहकारीमा पर्न जाने वित्तिय संकट टार्न, नेपालको सहकारी अभियानलाई व्यवस्थित र व्यवसायीक बनाउन सहकार्य गर्ने जनाएका छन् । सहकार्य गर्नका लागि नेफ्स्कूनका वरिष्ठ उपाध्यक्ष चन्द्र ढकालको संयोजनमा बैंक र नेफ्स्कूनका प्रमुख कार्यकारी अधिकृत पदेन सदस्य रहने गरी ८ सदस्यीय कार्यदलसमेत गठन गरिएको छ ।
नेपाल सहकारी पत्रकार समाजले आयोजना गरेको सरोकारवालाहरुसंगको भिडियो कन्फ्ररेन्समा बोल्दै बैंकका अध्यक्ष केबि उप्रेतीले बैंक र नेफ्स्कूनका देश भरिका शाखाबाट लिने दिने व्याजमा एकरुपता हुने बताए ।
तत्कालीन, मध्यकालीन र दीर्घकालीन योजना बनाएर सहकार्य गरिने उनको भनाई छ । तरलता व्यवस्थापन गर्न, बचत र ऋण सहकारीमा हुने कारोबारमा एकरुपता हुने उनको भनाइ छ । यसले नमुना परियोजना सञ्चालन गर्न पनि सजिलो हुने उनले बताए । प्रदेश स्तरीय नमुना परियोजनाका लागि प्रयास भइरहेको भन्दै उक्त परियोजनामा बैंकले ७० प्रतिशत लगानी गर्ने उप्रेतीले बताए ।
नेफ्स्कूनका अध्यक्ष परितोष पौड्यालले कार्यदलको प्रतिवेदन आएपछि बैंकसंग दीर्घकालीन सहकार्य गरिने बताए । बिषयका आधारले यात्रा केही फरक रहेपनी बैंकसंग अन्तरबिरोध नरहेको उनको भनाई छ ।
कार्यदलका संयोजक चन्द्रप्रसाद ढकालले सहकार्यले सिङ्गो सहकारी माझ खुसी छाएको बताए । प्रारभिक प्रतिवेदन बनाउने क्रममा १३ वटा बिषयमा सहकार्य हुने उनको भनाई छ । यो जोखिमपुर्ण काम भएपनि सहकारीको दिगो व्यवस्थापनका लागि सहकार्य आवश्यक भएको उनको भनाइ छ ।
बैंकका प्रमुख कार्यकारी अधिकृत बद्री गुरागाईंले वित्तिय प्रोड्क्ट डिजिटलाइजेसन गर्न सहकार्यमा जोड दिइएको बताए । सहकार्य पश्चात बैंकको चेक नेफ्स्कून मार्फत र नेफ्स्कूनको चेक बैंकमार्फत साटिने छ । कार्यदलले बैशाख २७ गतेसम्म प्रारम्भिक प्रतिवेदन तयार गर्ने जनाइएको छ ।
तरलता व्यवस्थापनका लागि दुवै संस्थाले विपद् ब्यवस्थापन केन्द्रिय तरलता कोष स्थापना गर्ने जनाएका छन् । उक्त कोषमा बैंकले एक अर्ब र नेफ्स्कूनले १० करोड रुपैंया जम्मा गरेको बताए । कोरोनाले नेपाल सहित विश्व नै संकटबाट गुज्रिरहेको बेला सहकारीमा समस्या आउन नदिन कोष खडा गरिएको उनीहरुको भनाई छ ।
