काठमाडौं । सिटिजन्स बैंक इन्टरनेशनल चालू आर्थिक वर्षको तेस्रो त्रैमासको अपरिष्कृत वित्तीय विवरण प्रकाशित गर्ने पहिलो वाणिज्य बैंक बनेको छ ।
१ महिनाभन्दा लामो लकडाउनका बीच सिटिजन्स बैंकले खुद नाफा बढाएको छ । लकडाउनका कारण नियमित ऋण जारी गर्न नपाउँदा पनि बैंकले नाफामा सुधार गरेको छ ।
बैंकले मंगलबार प्रकाशित गरेको वित्तीय विवरण अनुसार तेस्रो त्रैमासको अन्त्यसम्ममा १ अर्ब ९ करोड १२ लाख ४५ हजार रुपैयाँ खुद नाफा कमाएको छ ।
यो गत आर्थिक वर्षको सोही अवधिको तुलनामा २ करोड १६ लाख ४४ हजार रुपैयाँ अर्थात् २.०२ प्रतिशत बढी हो। बैंकले गत आर्थिक वर्षको सोही अवधिमा १ अर्ब ६ करोड ९६ लाख १ हजार रुपैयाँ खुद नाफा कमाएको थियो।
बैंकले चालू आवको तेस्रो त्रैमास (माघ–चैत) मा मात्र ४० करोड ३५ लाख ४४ हजार रुपैयाँ खुद नाफा कमाएको छ । यो गत वर्षकोयसै अवधिको तुलनामा १० करोड ४३ लाखले बढी हो । बैंकले गत आर्थिक वर्षको तेस्रो त्रैमासमा २९ करोड ९२ लाख रुपैयाँ खुद नाफा कमाएको थियो ।
बैंकको खुद ब्याज आम्दानी गत आवको यसै अवधिको तुलनामा १५ करोड ७५ लाख रुपैयाँ र सञ्चालन मुनाफा ३ करोड १७ लाख ४२ हजार रुपैयाँले बढेको छ ।
बैंकले २ अर्ब २४ करोड ४८ लाख १३ हजार रुपैयाँ खुद ब्याज आम्दानी गरेको छ भने १ अर्ब ५२ करोड ३१ लाख ४७ हजार रुपैयाँ सञ्चालन मुनाफा गरेको छ।
८ अर्ब ६२करोड रुपैयाँ चुक्ता पूँजी रहेको बैंकको जगेडा कोषमा ३ अर्ब ४९ करोड ३३ लाख ६७ हजार रुपैयाँ र सेयरधनी कोषमा ४५ करोड ३३ लाख ८९ हजार रुपैयाँ सञ्चित छ।
चैत मसान्तसम्ममा ४१ करोड ९ लाख ६५ हजार रुपैयाँ वितरण योग्य मुनाफा रहेको यस बैंकको प्रतिसेयर आम्दानी १७ पैसाले घटेर १६.८७ रुपैयाँमा झरेको छ भने प्रतिसेयर नेटवर्थ ३.४९ रुपैयाँले घटेर १४५.७७ रुपैयाँ छ ।
बैंकले खराब कर्जा ०.३८ प्रतिशतले घटाउन सफल भएको छ । गत वर्षको यसै अवधिको १.५८ प्रतिशत खराब कर्जा रहेको बैंकले चालू आवको तेस्रो त्रैमासमा घटाएर ०.९७ प्रतिशतमा झारेको छ । मूल्य आम्दानी अनुपात १०.६७ गुणा कायम भएको छ।
