काठमाडौं । युरोपेली युनियन (ईयू)ले नेपाललाई कोरोना भाइरससँग लड्नका लागि ९ अर्ब ८० करोड रुपैयाँ (७ करोड ५० लाख युरो) सहयोग गर्ने भएको छ । कोरोना भाइरस प्रकोपसँग जुध्न र यसको असर न्यूनीकरणका लागि ईयूले उक्त सहयोग प्रदान गर्ने घोषणा गरेको हो।
ईयूले दिँदै आएको सहयोग प्रतिबद्धतालाई पुनप्राथमिकीकरण र थप सहयोगसमेत गरी सरकारलाई बजेटरी सहयोग दिएको हो। यो रकम सरकारले नै खर्च गर्न सक्छ ।
नेपालका लागि युरोपेली संघकी राजदूत वरोनिका कोदीले नेपाल र युरोपेली संघसँगको लामो समयदेखिको मित्रतालाई ध्यानमा राख्दै ईयूले अहिलेको संकटबाट जोखिमयुक्त समुदायमा पर्ने असर न्यूनीकरणमा सहयोग गर्ने बताइन् ।
यस्तो अवस्थामा अन्तर्राष्ट्रिय साझेदारी र ऐक्यबद्धता अझ सशक्त हुनुपर्ने उनको भनाइ थियो।
