काठमाडौं । सरकारले आर्थिक वर्ष २०७६/७७ को बजेटमार्फत कर्मचारीहरूको वृद्धि भएको तलब आजबाट कार्यान्वयनमा गएको छ । कर्मचारीहरुको वृद्धि भएको १८ देखि २० प्रतिशतसम्म तलव आजबाट लागू भएको हो ।
करिब साढे ५ लाख कर्मचारीले पाउँदै आएको तलवमा कार्यालय सहयोगीदेखि नायब सुब्बासम्मको २० प्रतिशत र शाखा अधिकृतदेखि माथिल्लो पद मूख्यसचिवको तलब १८ प्रतिशतले वृद्धि भएको हो ।
सबैभन्दा तल्लो तहको कर्मचारी कार्यालय सहयोगीको तलबमा ३ हजार २ सय ४६ रुपैयाँ प्रतिमहिना वद्धि भएको छ । उसले यसअघि पाउँदै आएको १६ हजार २३० रुपैयाँबाट बढेर अब १९ हजार ४७६ रुपैयाँ पुगेको हो ।
सबैभन्दा माथिल्लो तह मुख्य सचिवको तलब ९ हजार ९३६ रुपैयाँले बढेको हो । मुख्यसचिवको तलवमान यसअघि ५५ हजार २०० रुपैयाँ रहेकोमा आजबाट बढेर ६५ हजार १ सय ३५ रुपैयाँ पुगेको छ ।
खरिदारको तलब २२ हजार १ सय ७० बाट ४ हजार ४३४ रुपैयाँले बढेर २६ हजार ६०४ रुपैयाँ पुगेको हो ।
झन्डै साढे दुई लाख हाराहारी रहेका सेवानिवृत्त कर्मचारीहरूको पेन्सनसमेत वृद्धि भएको छ । पूर्व कर्मचारीहरूको पेन्सनमा जुन पदबाट सेवानिवृत्त भएको हो, त्यही पदको बहालवाला कर्मचारीको बढेको तलबको ६६ प्रतिशतका दरले वृद्धि हुनेछ ।
सबै तहका कर्मचारीहरुले पाउँदै आएको मासिक २ हजार रुपैयाँ महँगी भत्ता, वार्षिक ७ हजार ५ सय कपडा भत्ता यस वर्षपनि यथावत् राखिएको छ ।
त्यस्तै दुई दर्जनभन्दा बढी कार्यालयका कर्मचारीहरुले पाउँदै आएको सय प्रतिशतसम्मको प्रोत्साहन भत्तासमेत यथावत् छ ।
