काठमाडौं । भैरहवामा बन्दै गरेको गौतमबुद्ध विमानस्थल निर्माणमा मौलिकपन नभएको भन्दै संसदको दिगो विकास तथा सुशासन समितिका सांसदले आपत्ति जनाएका छन् ।
समिति सदस्य सरिता प्रसाईले भैरहवामा बन्दै गरेको गौतमबुद्ध विमानस्थलमा कहि कतै मौलिकपन नझल्केको भन्दै आपत्ति जनाएकी हुन् ।
उनले हिजो मंगलवार संसद सचिवालयमा भएको पत्रकार सम्मेलनमा बोल्दै गौतमबुद्ध विमानस्थलमा नेपाली संस्कृति झल्काउने खाल्को कुनै पूर्वाधार नभएको भन्दै अब बन्न बाँकी पूर्वाधारमा यी विषय समेट्न समितिले निर्देशन दिएको बताइन् ।
‘अहिले बन्दै गरेको गौतमबुद्ध विमानस्थल कतै विदेशबाट टपक्क टिपेर ल्याएर राखे जस्तै बनेको छ, त्यसमा हामीले अब बन्ने भौतिक पुर्वाधारमा नेपाली मौलीकत्ता झल्काउन निर्देशन दिएका छौँ,’ पसाईले भनिन् ।
दिगो विकास तथा सुशासन समितिकी सभापति तारादेवी भट्टले चालु आर्थिक वर्षमा पोखरा विमान विमानस्थल, गौतमबुद्ध विमानस्थल, भेरी बबई डाइभर्सन, रानीपोखरी र धरहराको स्थलगत भ्रमण गरिएको जानकारी दिइन् ।
उनले यस विषयमा सम्बन्धीत मन्त्रालयलाई समस्या सहितको सुधारका लागि पत्रचार गरिएको जानकारी दिइन् ।
‘हामीले समिति बनेको पहिलो वर्ष थोरै मात्र काम गर्ने समय पाएका थियौ । त्यस अवधिमा आफ्नो तर्फबाट सक्ने काम गरेका गछौँ, अब आउँदो वर्षमा यसलाई विस्तार गर्दै लैजाने छौँ,’ सभापति भट्टले भनिन् ।
यस्तै समितिकी सदस्य विमला राई पौड्यालले हरेक प्रदेशमा के कस्ता विकास निर्माणको काम भइरहेको छ भन्ने जानकारी समितिलाई आउनेगरि कामअघि बढाउने बताइन् ।
काठमाडौं उपत्यकामा विकास निर्माण भएको नदेखिए पनि प्रदेशहरुमा जाँदा विकासको अनुभव गर्न पाइएको पौड्यालले बताइनन् ।
यस्तै सांसद कालिबहादुर मल्लले भौतिक पुर्वाधार मन्त्रालय र संघिय संसद सचिवालयको स्टोर तथा चमेना गृहमा समेत अवलोकन गरिएको बताए ।
उनले आफैबाट सुधारको आवस्यकता भएको भन्दै मन्त्रालय भित्रबाटै अवलोकन तथा सुधारको काम सुरु गरिएको जानकारी दिए ।
