काठमाडौं । सडक विभागले जडान गरेको ८ स्थानका ट्राफिक लाइट आजबाट बल्ने भएको छ । सडक विभाग अन्तर्गत सडक सुरक्षा तथा ट्राफिक शाखाका सिनियर डिभिजनल इन्जीनीयर दिप बाराहीले ८ स्थानमा रहेका ट्राफिक लाइट बल्न तयार भएको बताएका हुन् ।
उनले पानी नपरे आज मंगलबारबाटै ७ स्थानमा ट्राफिक लाइट बाल्न सुरु गरिने बताए ।
‘हामी, हिजो अस्तीबाटै बत्ती बाल्ने योजनामा थियौँ तर, पानीका कारण आवश्यक जनशक्ति खटाउन नसक्दा बत्ती बाल्नमा समस्या भएको हो, आज पानी परेन भने आजबाटै ट्राफिक लाइट बाल्छौँ,’ बाराहीले भने ।
उनले प्रत्येक ट्राफिक लाइट बाल्ने ठाउँमा ३ देखि ४ जना ट्राफिक र एक जना टेक्नीसियन खटाउनुपर्ने भएकाले मौसम हेर्नु परेको बताए ।
तिनकुनेमा भने विद्युतको तार जोड्न बाँकी भएकाले त्यसमा बत्ती बाल्न केही समय लाग्ने उनले बताए ।
ट्राफिक लाइट जडानका लागि विभागले प्रजील कन्स्ट्रक्सनलाई ठेक्का दिएको थियो । प्रजीलले ९७ लाख ५० हजार रुपैयाँमा उक्त टेन्डर पाएको हो ।
सिंहदरबार, पद्मोदयमोड, तिनकुने, कालिमाटी, बागबजार, गौशला, मित्रपार्क र पुरानो बानेश्वरमा ट्राफिक लाइट जडान तथा मर्मत गरिएको छ । तीनकुने, कालिमाटी, पुरानो बाननेश्वर चोक, गौशाला र मित्रपार्कमा नयाँ लाइटहरु जोडिनेको हो भने अन्य स्थानमा रहेका पुरानै ट्राफिक लाइट मर्मत गरि सञ्चालनमा ल्याउन लागिएको हो ।
ट्राफिक लाइट संचालनमा आएसँगै ट्राफिकले धुलो खाँदै गर्नुपरेको काम लाइटले गर्नेछ । हाल अधिकांश सडककका ट्राफिक लाइट अलपत्र छन् । उपत्यकाका २० भन्दा बढी स्थानका ट्राफिक बत्ति बिग्रिएका छन् ।
