काठमाडौं । सरकारले कोरोना भाइरसको जोखिम कम गर्न अत्यावश्यक बाहेक अन्य काममा बाहिर ननिस्कन आग्रह गरेको छ । आजदेखि लामो दूरीका सवारी साधनमा रोक लगाइएको छ । भारत र चीनसँगका सीमा नाका पनि बन्द गरिएको छ ।
अत्यावश्यक बाहेका कार्यालय तथा बजारका अधिकांश पसलहरु बन्द गरिएको छ । यससँगै मानिसहरु घरमै ‘सेल्फ क्वारेन्टाइन’मा बस्न थालेका छन् । जसले गर्दा बजारमा खाद्य सामग्रीको माग पनि बढेको छ । उपभोक्ताले खाद्य सामग्री स्टक राख्न थालेपछि यसको माग ह्वात्तै बढेको व्यापारीहरु बताउँछन् ।
कोरोनाको जोखिम बढ्दै गएपछि उपभोक्ताले दाल, भामल, नुन, तेल लगायत सामग्रीको जोहो गर्न थालेका छन् । सरकारले सर्वसाधरणलाई नआत्तिन र खाद्य सामग्री मौज्दात रहेको बताए पनि उपभोक्ताले खाद्य सामग्री अभाव हुने संभावना रहेको भन्दै स्टक राख्न थालेपछि बजारमा माग बढेको हो ।
नेपाल खुद्रा व्यापार संघका अध्यक्ष राजकुमार श्रेष्ठले पछिल्लो समय कोरोनाका कारण खाद्य अपुग हुने हो कि भन्ने डरले मागमा उच्च वृद्धि भएको बताए । उनका अनुसार अहिले उपत्यकामा खाद्यको माग २५ प्रतिशतले वृद्धि भएको छ । विगतका केही दिनमा खाद्यान्नको विक्री ३५ प्रतिशतले वृद्धि भएको उनले बताए ।
अहिले खाद्यान्नको विक्री ह्वात्तै बढे पनि केही दिनमा माग घट्ने उनले बताए । उनले कोरोनाका डरले लाखौं मानिस उपत्यकाबाट बाहिरिएका र यहाँ बस्नेले पनि केही महिनाका लागि खाद्यान्न जोहो गरिसकेकाले केही दिनमा खाद्यान्नको माग घट्ने बताए ।
‘केही दिन अघिदेखि खाद्यान्न विक्री ३५ प्रतिशतले बढेको छ, अब क्रमश यसको माग घट्दै जान्छ,’ श्रेष्ठले चाणक्य पोष्टसँग भने । उनले ६ महिनाका लागि पुग्ने सामग्री स्टकमा रहेकाले उपभोक्तालाई अनावश्यक स्टक नराख्न आग्रह समेत गरे ।
कोरोना भाइरस उत्पन्न हुने हो कि भनेर सर्वसाधनले खाद्य वस्तु अभाव नहोस भनेर आवश्यक जोहो गर्न थालेपछि व्यापारीले खाद्यान्नको मूल्य समेत वृद्धि गरेका छन् । चिनीमा प्रतिकेजी ५ रुपैयाँ बढेको छ । चिनीको मूल्य ८० रुपैयाँदेखि ८५ रुपैयाँ पुगेको हो ।
नयाँ चामल बोरामा ५० रुपैयाँदेखि १ सय रुपैयाँसम्म मूल्य वृद्धि भएको छ । विगतमा बोराको १ हजार ५ सय ५० देखि १ हजार ६ सय ५० रुपैयाँ पर्ने जिरा–मसिनो चामलको मूल्य हाल १ हजार ७ सय ५० रुपैयाँ पुगेको छ ।
यस्तै मासको दालमा १० देखि २० रुपैयाँ वृद्धि भएको छ । मासको दाल अधिकतम १ सय ५० रुपैयाँ प्रतिकेजी रहने गरेकोमा हाल प्रतिकेजी १ सय ७० रुपैयाँ प्ुगेको हो । नेपाली मुसुरोको दालको मूल्यमा ५ रुपैयाँ बढेको छ । मुसुरोको दालको मूल्य प्रतिकेजी १ सय ३० रुपैयाँ पुगेको छ ।
