काठमाडाैं । आज आइतबार बिहान सेयर बजार अलपत्र परेको छ । नेप्सेले कारोबारको सर्भर खोल्यो, ब्रोकरले खोलेनन् । धितोपत्र बोर्डले खोल्ने वा नखोल्ने भन्ने विषयको प्रभावकारी समन्वय गर्न सकेन । अर्थमन्त्रालयले आज आइतबार कारोबार गर्ने वा नगर्ने भन्ने विषयमा ठोस निर्णय गरेको छैन । राज्यका विभिन्न निकायहरुको ठोस निर्णय गर्ने सन्दर्भमा अक्षमता, तिनीहरुबीच समन्वयको अभाव र सेयर ब्रोकरहरुको अलमलले आज मुलुकको एकमात्र सेयर बजार अलपत्र परेको छ ।
काेरोना जस्तो प्राणघातक महामारीले विश्व आतंकित पारेको बेलामा सेयर बजार पक्कै पनि अत्याधिक प्राथमिकतामा पर्ने विषय होइन । तर, यसले राज्यका विभिन्न निकायहरुको प्रभावकारीता र क्षमता भने उदांगो पारिदिएको छ ।
केही लगानीकर्ताहरु कारोबार नखोल्न भनेर नेप्सेमा धर्ना बस्न गएका छन् । सेयर किनेर बसेकाहरु सेयर मूल्य अझ घट्ला भनेर आत्तिएर धर्ना बस्न गएका होलान् । उता सेयर किन्न खुट्टा उचालेर बसेकाहरु भने बजार अझ घट्ला र किनौंला भनेर सेयर कारोबार खोल्नु पर्छ भन्दै कराइरहेका छन् ।
प्रधानमन्त्री केपी ओलीले गत शुक्रबार राष्ट्रको नाममा संवाेधन गर्दै अत्यावश्यक क्षेत्र बाहेक सबै क्षेत्र बन्द गर्नुपर्ने सरकारको निर्णय सुनाएका थिए ।
राजपत्रमा उल्लेख गरिएका १३ अत्यावश्यक क्षेत्रहरुमा सेयर बजार नपरेका हुनाले सेयर बजार बन्द गरिएको धितोपत्र बाेर्ड स्रोत बताउँछ । उता नेप्सेका महाप्रबन्धक चन्द्र साउद भने धितोपत्र बोर्डको निर्देशन नआइकन सेयर कारोबार रोक्न नमिल्ने हुनाले आफूहरुले सर्भर खोलेको बताउँछन् ।
उता धितोपत्र बोर्ड भने अर्थमन्त्रालयको निर्णय कुरेर बसको छ । उसँग सेयर बजार खोल्ने वा नखोल्ने भन्ने विषयमा प्रधानमन्त्रीको संवाेधन बाहेक अर्को कुनै ठोस निर्देशन छैन । यसरी सबै निकायहरु अलमलमा परिरहँदा अर्थमन्त्रालय अहिलेसम्म कुनै निर्णका साथ अगाडि आएको छैन ।
अर्थमन्त्रालयले यो विषयमा कुनै निर्णय दिएको छैन । सेयर बजार खोल्ने वा बन्द गर्ने भन्ने विषयमा समेत तुरुन्तै आफू मातहतका निकायहरुलाई निर्देशन दिन नसक्ने मन्त्रालयले कोरोनाको महामारी नेपालमा फैलिए त्यसको सामना कसरी गर्ला भन्ने गम्भिर प्रश्न खडा भएको छ ।
उता ब्रोकरहरुमा पनि कहीँ कतै प्रभावकारी समन्वय देखिएको छैन । केही ब्रोकरहरुले कारोबार खोलेका छन् भने केहीले खोलेका छैनन् । यो हास्यास्पद छ ।
केही लगानीकर्ताहरु कारोबार नखोल्न भनेर नेप्सेमा धर्ना बस्न गएका छन् । सेयर किनेर बसेकाहरु सेयर मूल्य अझ घट्ला भनेर आत्तिएर धर्ना बस्न गएका होलान् । उता सेयर किन्न खुट्टा उचालेर बसेकाहरु भने बजार अझ घट्ला र किनौंला भनेर सेयर कारोबार खोल्नु पर्छ भन्दै कराइरहेका छन् ।
विश्वमा जुन घनत्वमा यो भाइरस फैलिरहेको छ र यसले जति त्रास फैलाइरहेको छ, त्यसको दाँजोमा सेयर बजार खोल्नु वा नखोल्नु धेरै महत्वको विषय नहोला । तर, कोरोनाको विरुद्धमा भिषण लडाईंको संघारमा उभिएको नेपाल सरकार र उ मातहतका निकायहरुले सेयर बजारको सन्दर्भमा सामान्य ठोस निर्णय समेत गर्न नसक्नुले राज्य संयन्त्रको निर्णय क्षमताको भने राम्रै उजागर गरिदिएको छ ।
