काठमाडौं । चालू आर्थिक वर्षमा रोजागारीका लागि विदेशिनेको संख्या बढे पनि विदेशबाट भित्रिने रेमिट्यान्स भने घटेको छ । नेपाल राष्ट्र बैंकले सार्वजनिक गरेको पछिल्लो तथ्यांक अनुसार चालू आवको ७ महिनामा रेमिट्यान्स ०.५ प्रतिशतले घटेको छ ।
राष्ट्र बैंकका अनुसार चालू आवको माघसम्ममा विश्वका विभिन्न देशबाट ५ खर्ब १३ अर्ब २१ करोड रुपैयाँ रेमिट्यान्स भित्रिएको छ । गत आर्थिक वर्ष सोही अवधिमा रेमिट्यान्स प्रवाह २८.५ प्रतिशतले बढेको थियो । अमेरिकी डलरको रेमिट्यान्स प्रवाहमा ०.२ प्रतिशतले कमी आएको छ । गत आवमा सो रेमिट्यान्स प्रवाह १६ प्रतिशतले बढेको थियो ।
चालू आवको ७ महिनामा विदेश जानेको संख्या भने बढेको छ । सो अवधिमा अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) का आधारमा वैदेशिक रोजगारीमा जाने नेपालीको संख्या २१.७ प्रतिशतले बढेको छ । गत आवको सोही अवधिमा श्रम स्वीकृतिका आधारमा वैदेशिक रोजगारमा जानेको संख्या ३७.५ प्रतिशतले घटेको थियो ।
पुनः श्रम स्वीकृतिका आधारमा वैदेशिक रोजगारीमा जाने नेपालीको संख्या चालू आवको ७ महिनामा ०.६ प्रतिशतले घटेको छ । गत आवमा सोही अवधिमा पुनः श्रम स्वीकृतिका आधारमा वैदेशिक रोजगारीमा जानेको संख्या ४.९ प्रतिशतले बढेको थियो ।
नेपालमा खाडी मुलुक साउदी, कतार, यूएई लगायत अमेरिका, जापान, युरोपियन मुलुकबाट सबैभन्दा बढी रेमिट्यान्स भित्रिने गरेको छ ।
