काठमाडौ । वाणिज्य, आपूर्ति तथा उपभोक्ता संरक्षण विभागले अहिले मेडिकलहरुमा अनुगमन सुरु गरेको छ । मास्क तथा स्यानिटाइजरलाई अत्याधिक मुल्यमा विक्रि वितरण गरेको पाइएकोमा व्यापारीहरुलाई कारबाहि गर्दै आइरहेको छ । पछिल्लो समय त्रासको रुपमा फैलिएको कोरोना भाइरसको कारण अत्यावश्यक बनेको मास्क र स्यानिटाइजर अहिले बजारमा अभाव हुन थालेका छन् । विभागले बजार उजुरीको आधारमा नियमित अनुगमन गरिरहेको छ ।
विभागका अनुसार बजारमा यसको माग बढे सँगै व्यापारीहरुले लुकाउनुका साथै महङ्गो मुल्यमा बेच्न थालेको उजुरी पछि अनुगमन गर्न थालिएको हो । विभागले क्षेत्रपाटीमा रहेको आइज्याक हस्पिटेक सपोर्ट प्रालिलाई २ लाख जरिवाना गरेको छ । त्यसैगरि बढी मूल्यमा औषधी बेचेको कसुरमा वीर अस्पतालमा रहेको आयुष फार्मेसीलाई पनि विभागले २ लाख जरिवाना गरेको छ ।
विश्वभर फैलिएको कोरोना भाइरसका कारण अत्यावश्यक बनेको मास्क तथा स्यानिटाइजरको बढी मूल्य लिएर विक्री वितरण गरेको पाइए पछि जरिवाना गरिएको विभागले जानकारी दिएको छ ।
त्यस्तै विभागले खरिद बिल नराखिएको कसुरमा क्षेत्रपाटीको एमजे मेडिकलको सर्जिकललाई २० हजार र महाबौद्धको आर.एफ फार्मेसीलाई १० हजार जरिवाना गरेको छ ।
विभागले बजारमा सर्जिकल मास्कको कृत्रिम अभाव देखिएपछि अनुगमन सुरु गरेको हो । विभागले यो हप्तामा मात्रै १ दर्जनभन्दा बढी मेडिकलहरुमा अनुगमन गरिसकेको छ । कतिपय मेडिकलहरुमा भने सामान्य मुल्यमा नै बिक्रि भएको पाइएको छ । त्यस्तै विनायक सर्जिकल, दीप सर्जिकल सप्लायर्स र अविमा सर्जिकल सामान्य अवस्थामा पाइएको छ ।
‘अब उपत्यका बाहिर वीरगञ्ज, विराटनगर, भैरहवा, नेपालगञ्ज लगायतका सीमा क्षेत्रमा आपूर्तिको अनुगमन गर्ने छौँ । आपूर्ती नै नभएको हो कि व्यवसायीले नाफा लिन खोजेका हुन त्यसको कडा अनुगमन गरिने छ,’ वाणिज्य, आपूर्ति तथा उपभोक्ता संरक्षण विभागका महानिर्देशक नेत्र प्रसाद सुवेदीले चाणक्यपोष्टसँग भने ।
हालसम्म ७० भन्दा बढि मेडिकल तथा फार्मेसिहरुमा अनुगमन गरिएको उनले बताए । मन्त्रालयको तहबाट समेत एक्सन टिम बनाएर काम भइरहेको उनले जानकारी दिए ।
