काठमाडौं । नेपाली बजारमा सुनको मूल्य हालसम्मकै उच्च विन्दुमा पुगेको छ ।
मंगलबार ७८ हजार ३०० रुपैयाँमा कारोबार भएको छापावाल सुन एकैदिन तोलामा २२ सयले बढेर बुधबार ८० हजार ५०० रुपैयाँ कायम छ ।
नेपाल सुनचाँदी व्यवसायी महासंघका अनुसार बुधबार तेजाबी सुन पनि २२ सय रुपैयाँ प्रतितोलामा बढेर कारोबार भइरहेको छ । आज तेजाबी सुनको भाउ प्रतितोला ८० हजार २ सय रुपैयाँ पुगेको महासंघले जनाएको छ । मंगलबार तेजावी सुन ७८ हजार रुपैयाँ प्रतितोलामा कारोबार भएको थियो ।
बुधबार चाँदीको मूल्य प्रतितोला २० रुपैयाँले बढेर ८ सय ८० रुपैयाँ पुगेको महासंघले जनाएको छ । मंगलबार भने चाँदी प्रतितोला ८ सय ६० रुपैयाँमा कारोबार भएको थियो ।
विश्वव्यापी फैलिएको कोरोना भाइरसको प्रभाव अन्तराष्ट्रिय अर्थतन्त्रमा परेकाले सुनको मूल्य महँगिदै गएको हो ।अन्तर्राष्ट्रिय बजारमा आज सुन प्रतिऔंश १ हजार ६ सय ४५ अमेरिकी डलर पुगेको छ ।
