काठमाडौं । नेपाल नागरिक उड्डयन प्राधिकरणले (क्यान) नेपालगञ्ज विमानस्थल विस्तारका लागि मास्टर प्लान तयार पारेको छ । विस्तार पछि यो विमानस्थलको ‘रन वे’ २ हजार ६ सय ५० मिटर लामो हुने छ ।
यसको मास्टर प्लान तयार भइसकेको उड्डयन प्राधिकरणका सुचना अधिकारी त्रिलोचन पौडेलले बताए । उनका अनुसार उक्त विमानस्थल निर्माणका लागि १ सय १८ बिघा जमिन अधिग्रहण गर्नुपर्ने देखिएको छ । सो विभानस्थल निर्माण पछि ए–३२०, बी ७३७ र त्यसै अनुरुपका हवाइजहाजहरु समेत सञ्चालन गर्न सकिने छ ।
विमानस्थल निर्माणका लागि १२ अर्ब रुपैयाँका हाराहारीमा लागत अनुमान गरिएको छ । विमानस्थलमा टर्मिनल भवन निर्माणका लागि डिजाइन भइरहेको छ । सो भवन निर्माणका लागि २ अर्बको हाराहारीमा खर्च लाग्ने अनुमान गरिएको छ ।
अबको ५ वर्षमा नेपालगञ्ज विमानस्थल फुटपाथ सुधारका साथै सिआरजे ७०० र डस ८ जस्ता हवाइ जहाजहरु अटाउने गरि विस्तार गरिने छ ।
विमानस्थलको भौतिक निर्माणका लागि मात्र ४ अर्बको हाराहारीको लागत अनुमान गरिएको छ । जग्गा अधिग्रहणका क्रममा ३ अर्ब लाग्ने अनुमान छ । विमानस्थलको मास्टर प्लान अनुसार काम सुरु भइसकेको पौडेलले बताए ।
‘विमानस्थल स्तरोन्नती गर्ने काम सुरु भइसकेको छ । ५ वर्षमा अत्याधुनिक पूर्वाधारसहितको विमानस्थल निर्माण गर्ने छौं,’ पौडेलले भने ।
यस्तै क्यानले नेपालगञ्ज, चन्द्रगढी, धनगडी, भरतपुर, जनकपुर, राजविराज, सुरखेत, जोमसोम, जुम्ला, सिमिकोट, रारा, ताप्लेजुङ, साफ्रेफेदी, लामिडाँडा लगायतका विभिन्न विमानस्थल निर्माणका लागि ५ वर्षे योजना बनाएको छ । ति विमानस्थलहरु अबको ५ वर्षको अवधिमा अत्याधुनिक भौतिक निर्माणसहित स्तोरन्नती गरिने बताइएको छ ।
२२ वटा विमानस्थल सञ्चालन बिहिन
देशभर कुल ५४ वटा विमानस्थल रहेका छन् । ति मध्ये ३२ वटा विमानस्थल मात्र सञ्चालनमा रहेका छन् । २२ वटा विमानस्थल सञ्चालनमा ल्याउन सकिएको छैन । अहिले ३५ वटा विमानस्थलहरुमा ‘ओभर ले’ गर्ने काम भइरहेको छ । विगत २ वर्षमा ८ वटा विमानस्थलमा ‘ओभर ले’को काम सम्पन्न भएको छ ।
थप ८ वटा विमानस्थलमा यो आवभित्र ‘ओभर ले’ गरिने बताइएको छ । हाल डोल्पा, मछिनेचौर, कालिकोट बझाङ, बलेवा, गुल्मी, इलाम, तुम्लिङटार र सुर्खेत विमानस्थलमा ‘ओभर ले’ गर्ने काम भइरहेको छ ।
टुम्लिङटार र सुर्खेतमा ‘ओभर ले’को काम मात्र गरिने छ भने अन्य विमानस्थलहरुमा नयाँ ‘सरफेस’ राखिनेछ । हाल ‘ओभरल्याप’ गरिन लागेका ८ वटा मध्ये ६ वटा विमानस्थलमा घाँसे धावनमार्ग भएकाले कालोपत्र गरेर ‘ओभर ल्याप’ गरेर सरफेस निर्माण गरिने छ ।
विगतमा बनेका धावन मार्गहरु ‘ट्वीनअटर’ विमानलाई लक्षित गरेर बनाइएको थियो । त्यस अनुसार प्रत्येक धावनमार्ग ६ सेन्टी भन्दा माथिको रहेको छ । तर, अब भने त्यसमै ६ सेन्टी ओभर ल्याप थप गरेर त्यसमा एटीएफ ७२ समेत धान्न सक्ने गरी बनाइने छ ।
विगतमा रहेको सोही ओभर ल्यापमा सिआरजे क्यूरियस ८०० जहाजहरु चलाइदैं आएको छ । अब बन्ने धावनमार्गहरुले ठूला जहाजहरुलाई समेत धान्न सक्ने छन् । यस्तै क्यानले बन्द रहेका विमानस्थलहरु समेत विस्तारै सञ्चालनमा ल्याउने योजना बनाएको छ ।
