काठमाडौं। सेञ्चुरी कमर्सियल बैंकले चालु आर्थिक वर्षको दोस्रो त्रैमाससम्म ६५ करोड २ लाख रुपैयाँ खुद नाफा कमाएको छ । यो गत आर्थिक वर्षको यसै अवधिको भन्दा १३ करोड २१ लाख रुपैयाँ अर्थात २५.४९ प्रतिशत बढी हो । गत आर्थिक वर्षको सोही अवधिसम्ममा बैंकले ५१ करोड ८१ लाख रुपैयाँ खुद नाफा कमाएको थियो ।
बैंकको सञ्चालन नाफा र खुद ब्याज आम्दानी बढेर नै खुद नाफामा यो बढोत्तरी देखिएको हो । पुस मसान्तसम्ममा १ अर्ब ५२ करोड ७८ लाख रुपैयाँ खुद ब्याज आम्दानी गरेको बैंकले ९१ करोड ७ लाख रुपैयाँ सञ्चालन मुनाफा आर्जन गर्न सफल भएको छ । बैंकको खुद ब्याज आम्दानी गत आर्थिक वर्षको यसै अवधिको तुलनामा १८ करोड ८५ लाख रुपैयाँ र सञ्चालन मुनाफा १८ करोड ६० लाख रुपैयाँ बढी हो ।
दोस्रो त्रैमासको अन्त्यसम्ममा बैंकको वार्षिक प्रतिशेयर आम्दानी १५ रुपैयाँ ४५ पैसा कायम भएको छ । जुन गत आर्थिक वर्षका सोही अवधिको तुलनामा १ रुपैयाँ ८६ पैसा बढी हो । बैंकको मूल्य आम्दानी अनुपात ११.५२ ग्ुणा रहेको छ ।
