काठमाडौं । स्याफ्रुबेसी देखि रसुवागढीसम्म चीनले आफैं सडक निर्माण गरिरहेको छ । सो सडकमा चीनले ६० प्रतिशत काम सम्पन्न गरिसकेको छ । त्यहाँ रहेका पोल तथा घरहरु हटाउन हाल रसुवा कार्यालयमा पत्राचार गरिएको छ । सो कार्यालयले केही समयमै घर भत्काउन सूचना निकाल्ने भएको सडक विभागले जनाएको छ ।
गल्छी देखि रसुवागढी सडक खण्डका आयोजना प्रमुख नारायण भण्डारीका अनुसार सो सडकमा चीनले घरहरु नभत्किएसम्म बाँकी काम नगर्ने भएको हो । बाँकी कामका लागि घर भत्काएपछि मात्र चीनले काम गर्ने भएको उनले बताए । सुचना अनुसार आफै घर नभत्काए सडक विभागले आफै घर भत्काएर चीनका लागि बाटो खुल्ला गरिदिने छ ।
‘हामीले रसुवा कार्यालयलाई घर भत्काउन भनेको छौँ, उसले आज वा भोलिमा सूचना निकाल्ने छ, सो सुचनाको अवधि २५ देखि ३० दिनका लागि हुने छ । त्यो अवधिमा उनीहरुले नभत्काए हामी आफैं भत्काएर भएपनि काम गर्ने छौं,’ भण्डारीले चाणक्य पोष्टसँग भने ।
यस्तै गल्छीदेखि रसुवासम्मको सडक विस्तारको क्रममा हालसम्म २ अर्ब रुपैयाँ खर्च भइसकेको छ । उनका अनुसार सो सडक खण्ड निर्माणको काम २०७८÷७९ सालसम्ममा सकिसक्ने छ । हाल सो सडक खण्ड विस्तारको ३ वर्ष पुरा भएको छ ।
कुल ९ अर्ब ५ करोड लगानीमा बन्ने लागेको सो सडक खण्डमा २ चरणमा काम भइरहेको छ ।
पहिलो चरण तर्फ गल्छीदेखि मैलुङसम्म ४६ किलोमिटर लम्बाईको सडकमा २० किलोमिटर सडक कालोपत्रे भइसकेको छ । बाँकी अन्यमा कालोपत्रे हुने क्रममा रहेको उनले बताए ।
आयोजना प्रमुख भण्डारीका अनुसार सो सडक खण्ड अन्तर्गत २२ वटा पुल पनि बन्दै छ ।
दोस्रो चरणमा मैलुङदेखि स्याफ्रुबेसीसम्म १९ किलोमिटर सडक खण्डमा कालोपत्रका लागि ठेक्का प्रकृया भइरहेको छ । सो खण्डमा ठेक्काको मूल्याङंकनको चरणमा रहेको छ । मूल्याङकन पछि सो सडकको पिचको काम सुरु हुने छ । उनले सो सडकको कालोपत्रेको कामपनि चाँडै सुरु हुने बताए ।
गल्छीदेखि र सुवागढीसम्म कुल ८२ किलोमिटर लम्बाइमा सडक विभागले सडक बनाउने काम गरिरहेको छ । सो सडकको विस्तार काम २०७३ मा सुरु भएको हो ।
