काठमाडौं। चालु आर्थिक वर्षको दोस्रो त्रैमाससम्मको वित्तिय विवरण सार्वजनिक हुन थालेको छ । हालसम्म एनआइसी एसिया, सानिमा, सिद्धार्थ र सिटिजन्स गरेर चारवटा वाणिज्य बैंकहरुले वित्तिय विवरण सार्वजनिक गरेका छन् ।
४ मध्ये एनआइसी एसिया र सानिमाले खुद नाफा बढाएका छन् भने सिद्धार्थ र सिटिजन्सले खुद नाफा घटाएका छन् । चालु आर्थिक वर्षको दोस्रो त्रैमाससम्म एनआइसी एसियाले २ अर्ब २ करोड, सानिमाले १ अर्ब १५ करोड, सिद्धार्थले १ अर्ब २ करोड र सिटिजन्सले ६९ करोड रुपैयाँ खुद नाफा गरेका छन् ।
यसैकारण एनआइसी एसियाको प्रतिसेयर आम्दानी ४१.६१ रुपैयाँ छ भने सानिमाको २६.०१ रुपैयाँ रहेको छ । उता सिद्धार्थ र सिटिजन्सको भने क्रमशः २०.९८ र १५.९५ रुपैयाँ रहेको छ ।
स्रोतः प्रमोद केसी
यो हिसाबले स्वभावीक रुपले एक लगानीकर्ताको रुपमा सबैभन्दा आकर्षक एनआइसी एसिया र सानिमा नै लाग्छन् । तर, नाफा कमाउने दृष्टिकोणले हेर्दा सँधै यस्तै अवस्था नहुन पनि सक्छ ।
त्यसैले हामीले यहाँ यिनै ४ वटा बैंकहरुको पछिल्लो वित्तिय विवरणलाई नै आधार मानेर यहाँ केही फरक तथ्याङ्क र दृष्टिकोण राख्ने प्रयास गरेका छौं ।
दास्रो त्रैमाससम्मको वित्तिय विवरण हेर्दा यी ४ बैंकको वितरण योग्य नाफाको वार्षिकिकरण क्रमशः २ अर्ब ३२ करोड, १ अर्ब ८३ करोड, १ अर्ब १४ करोड र १ अर्ब १२ करोड रहेको छ ।
यसैगरी गत वर्षको सञ्चिती नाफालगायत समेत जोड्दा यी ४ बैंकको वार्षिकिकरण गरिएको वितरण योग्य नाफा क्रमशःल २ अर्ब ५७ करोड, १ अर्ब ९० करोड, १ अर्ब ६० करोड र १ अर्ब १२ करोड हुन्छ ।
यसैका आधारमा आगामी वर्षको यी ४ बैंकको अनुमानित लाभांश क्रमशः २६.४७ प्रतिशत, २१.५९ प्रतिशत, १६.३४ प्रतिशत र १२.९९ प्रतिशत हुन आउँछ ।
यहाँसम्म सामान्य लगानीकर्ताको दृष्टिकोणले सबैभन्दा आकर्षक एनआइसी एसिया लाग्छ भने त्यसपछि सानिमा, सिद्धार्थ र सिटिजन्स लाग्छन् ।
तर, यहाँ ध्यान दिनुपर्ने कुरा के पनि हो भने एनआइसी एसियाको सेयर मूल्य प्रति कित्ता ४७५ रुपैयाँ हाराहारी छ भने सानिमाको ३५०, सिद्धार्थको ३१० र सिटिजन्सको २०० रुपैयाँ भन्दा पनि कम छ ।
मूल्य र अनुमानित लाभांशको दृष्टिकोणले हेर्दा अहिले सेयर किन्दा एनआइसी एसियाको कुल ‘रिर्टन’ ५.६१ प्रतिशत, सानिमाको ६.१६ प्रतिशत, सिद्धार्थको ५.१६ प्रतिशत र सिटिजन्सको ६.६६ प्रतिशत हुन आउँछ ।
यसको मतलब सबैभन्दा कम नाफा कमाएको र सबैभन्दा कम लाभांश दिने क्षमता भएको सिटिजन्सको कुल रिर्टन अन्य ३ बैंकको भन्दा आकर्षक देखियो । यसैगरि सबै सूचकका आधारमा अन्य भन्दा आकर्षक देखिएको एनआइसी एसिया सिद्धार्थ बैंक भन्दा मात्र आकर्षक ठहरियो ।
हालै एक सञ्चार माध्यमले गरेको सामान्य अध्ययनले पनि नेप्से १८८१ मा पुग्दा उच्च मूल्यमा नबिल बैंक किन्ने र सिभिल बैंक किन्नेको अहिलेसम्मको कुल रिर्टन हिसाब गर्ने हो भने सिभिल बैंक किन्नेहरु नबिल बैंक किन्ने भन्दा कम घाटामा रहेको देखाएको थियो ।
यहाँ नबिल भन्दा सिभिल राम्रो वा एनआइसी भन्दा सिटिजन्स राम्रो भन्न खोजिएको होइन । तर, सेयर लगानीकर्ताको रुपमा ध्यान दिनुपर्ने बिभिन्न आयामहरु मध्ये यो पनि प्रमुख आयाम हो भनेर भन्न मात्र खोजिएको हो ।
