काठमाडौं । अब भन्सार प्रशासनलाई ‘पेपर लेस’ (कागज रहित) बनाइने भएको छ । भन्सार विभागका महानिर्देशक सुमन दाहालले अब भन्सार ‘पेपर लेस’ हुने बताएका हुन् । शुक्रबार आयोजित ६८ औँ अन्तराष्ट्रिय भन्सार दिवसको अवसरमा बोल्दै उनले भन्सार प्रशासन ‘पेपर लेस’ प्रशासनमा विकास गर्दै लैजाने बताएका हुन् ।
‘हालसम्म हाम्रो विभागबाट हुने कामहरु मध्ये ९९.८ प्रतिशत अन्तराष्ट्रिय कारोबार अनलाइनबाट हुँदै आएको छ,’ महानिर्देशक दाहालले भने ।
कागजी प्रयोगबाट आयात तथा निर्यातको काम भएपनि अब आउँदो समयमा बाँकी कामहरु पनि डिजिटलाइज गर्दै पूर्ण डिजिटल बनाइने उनले बताए ।
हाल भन्सारका गुड क्लियरेन्स, बैंक पेमेन्ट, गेट इन्ट्रि, एक्जीट नोट, क्यास डिपोजिट म्यानेजमेन्ट लगायतकामहरु अनलाइन बाटै हुँदै आएका छन् ।
बैंकबाट हुँदै आएको यो कारोबार समेत अब आउँदो समयमा मोबाइलबाट सजिलै गर्न सकिने गरी व्यवस्था गरिने उनले जानकारी दिए ।
यस्तै पछिल्लो समय भन्सारबाटै वाइड एरिया नेटवर्क (डब्लुएएन) मार्फत नियमित रुपमा लाइभ मोनिटरिङ भइरहेको छ । आईपी क्यामेरा मार्फत सो नियमित मोनिटरिङ भइरहेको विभागका प्रवक्ता शिशिर घिमिरेले जानकारी दिए । उनले हाल भन्सारका मुख्य नाकाहरुमा हुने कृयाकलापहरु सिधै भन्सार विभागको कन्ट्रोल रुपमबाट हेर्न मिल्ने गरी राखिएको बताए ।
साथै चीनसँग कस्टम्स् करपोरेसन एग्रीमेन्ट सम्पन्न भएको विभागले जनाएको छ । सो सम्झौता भारतसँग पनि हुने क्रममा रहेको उनले बताए ।
