काठमाडौं । घरजग्गा धितो रोक्का शूल्कमा सरकारले सहकारीलाई प्राथमिकता दिदैं आएको छ । बैंक मार्फत धितो रोक्का गर्दा न्यूनतम २ हजार देखि ५ हजार रुपैयाँसम्म शूल्क तिर्नु पर्ने हुन्छ । तर, सरकारले प्रथमिकता दिएका कारण त्यही काम सहकारी मार्फत गर्दा २ सय रुपैयाँदेखि माथी लाग्ने कलंकी मालपोत कार्यालयका मालपोत अधिकृत पुर्ण बहादुर केसीले जानकारी दिए ।
उनका अनुसार ३० लाख रुपैयाँसम्मको घरजग्गा धितो संरक्षण गर्दा सहकारी मार्फत गर्नेले २ सय रुपैयाँ शूल्क तिर्नुपर्ने हुन्छ । त्यही धितो रोक्का बैंक मार्फत गर्दा २० लाख भन्दा कमलाई ३ हजार र २० लाख रुपैयाँदेखि ५० लाख रुपैयाँसम्मको धितो रोक्का गर्दा ५ हजार रुपैयाँ लाग्ने गरेको छ ।
‘हामीले ३० लाखसम्मको धितो रोक्का गर्दा सहकारीलाई २ सय रुपैयाँ लिन्छौं र त्यही धितो रोक्का गर्दा बैंकलाई ३ हजार रुपैयाँदेखि ५ हजार रुपैयाँ शूल्क लिने गरेका छौं,’ केसीले चाणक्यपोष्टसँग भने ।
यो भन्दा माथीको धितो रोक्कामा भने बैंक र सहकारी दुवैमा एउटै शूल्क तोकिएको केसीले जानकारी दिए ।
१ करोड रुपैयाँसम्मको घरजग्गा धितो रोक्काको शूल्क २० हजार रुपैयाँ रहेको छ भने २ करोड रुपैयाँसम्मको घरजग्गा धितो रोक्का गर्दा ३० हजार रुपैयाँ शूल्क लाग्ने छ ।
२ करोड रुपैयाँदेखि माथी ५ करोड रुपैयाँसम्मको धितो रोक्का गर्दा ६५ हजार शूल्क लाग्ने उनले जानकारी दिए । ५ करोड भन्दा माथीको धितो रोक्का गर्दा भने एक लाख रुपैयाँ लाग्ने उनले बताए ।
